التسجيل | صور رائعة | رفع الصور | منتديات حواء النسائية | منتدى التصميم | للإعلان لدينا
|
|
|
|
التسجيل | صور رائعة | رفع الصور | منتديات حواء النسائية | منتدى التصميم | للإعلان لدينا |
|
| ஐ خالـــد و بنــدر ஐ الكاتب : أم الزبير الأنصارية ஐ الجزء الأول ஐ الصداقة من أقوى العلاقات الانسانية.., علاقة ... |
 |
|
 |
 |
 |
 |
|
|||||||
| الملاحظات |
|
| قصص واقعية و روايات أجمل وأروع القصص الواقعية والخيالية |
 |
 |
|
|
|
 |
 |
 |
|
|
أدوات الموضوع |
07-19-2008, 01:41 AM
|
#1 |
|
|
خالـــد و بنــدر
ஐ خالـــد و بنــدر ஐ
الكاتب : أم الزبير الأنصارية ஐ الجزء الأول ஐ الصداقة من أقوى العلاقات الانسانية.., علاقة يميزها أنها تجمع عدة مشاعر وأحاسيس في إطارها مثل المحبة ،التضحية وغيرها.. يمكن أغلبنا أو أقدر أقول يمكن كلنا حصلت له مواقف مع أصدقاءه.. منها الحلو ومنها المر.. منها اللي تقوي العلاقة ومنها اللي تنهيها.. قصتي تتكلم عن هالموضوع.., تقدرون تقولون إنها تحمل مشاعر أكثر من إنها أحداث.. لكني قررت بعد تفكير طويل اني أعرضها للناس عشان يستفيدون منها.. إحنا كمجتمع للرجال حدود الصداقة غالبا معروفة عندنا.. وأغلبها تكون للوناسة والمصلحة.., أنا ما أقول الكل بس أكثرها لكن اللي صار معي شي ثاني وهاذي قصتي.. في عام 1408هـ.., كنا تونا منتقلين للرياض والدراسة بدت من اسبوعين تقريبا.. كنت في سنة رابع ابتدائي دخلت فصلي الجديد وسوا الاستاذ تعارف بسيط بيني وبين الطلاب.. لما جا وقت الراحة طلع الجميع إلا أنا.. دخل ولد اسمراني شعره حوسة واسنانه الاربع الامامية اللي متكسر واللي طايح.. مشمر أكمامه ووجهه كله مخوش وحالته لله إلا إنه رغم كل هالبلاوي فيه شيء يخليها مو باينة!!.. قعد يحوس في شنطته ساعة وكل دقيقة يطلع خرابيط وكل شوي يرفع عينه عندي.. وأخيرا طلع منها نبيطة.. وقبل لا يطلع التفت علي وكان من النوع الي كنه بينطحك وهو يطالع.. منزل راسه شوي ومعبس طول الوقت بس كانت بريئة أكثر من إن تكون مرعبة!! وقال بلدغة طفولية سببها واضح وهو أسنانه اللي حالتها صعبة:أنت الحين ليش جالس لحالك..؟؟ كانت هاذي أول جملة سمعتها من الانسان اللي صار بعد كذا أغلى البشر قلبي.. كان معروف عني إني انطوائي ومنعزل هاذي طبيعتي حتى اني اتوتر لما يكلمني أحد ما اعرفه.. رديت عليه: بس كذا أنا ما أبي أطلع وبعدين أنا ما أعرف أحد هنا.. وبنفس النظرات اللي والله أعلم إنها كانت عادة عنده.. تعال معي وأنا أعرفك نص اللي في المدرسة.. كان يجرني من يدي وأنا أسحبها بخوف.. لا لا أنا كذا مرتاح قلت لك ما أبي اطلع.. لكن الولد أصر لين طلعني معه بالغصب.., وزي ما قال عرفني نص المدرسة تقريبا.. لكن تبون الصدق حسيت اني تعلقت فيه هو!! يمكن عشان شخصيته عكسي تماما اجتماعي, خفيف دم والكل يحبه ويحاول يتقرب منه.. صحيح إنه كان شيطاني ومشاغب لكنه ماكان يتعدى أحد!! حسيت إني مبهور بشخصيته ورغم أنه ذكي جداً إلا أنه في الدراسة ما كان بالحيل.. بس كان يعرف يمشي عمره من يومه صغير.. و كثر الأولاد اللي يعرفهم إلا أنه بعد تعلق فيني فوق ما تتصورون.. صرنا ما نتفارق أبد ولا يشوفون واحد فينا بدون الثاني.. مرت السنوات وصداقتي تزداد قوتها مع خالد.. التعديل الأخير تم بواسطة قيثارة الحب ; 07-19-2008 الساعة 02:23 AM. |
|
|
|
07-19-2008, 01:44 AM
|
#2 |
|
|
ஐ الجزء الثاني ஐ
مرت علينا سنين الطفولة والمراهقة وحنا سوى.. ودخلنا الجامعة وتخرجنا وحنا ما عمرنا تفارقنا.. حتى في السفر ما أذكر إن واحد سافر بدون الثاني الا اذا كانت السفره مع الاهل.. أغلب الناس اللي يعرفونا يحاولون ياخذونا قدوة وكثير منهم يضربون المثل في صداقتنا.. يمكن تتسآءلون وش سر هالصداقة العميقة؟!! شي واحد كنا نطبقه بدون ما نحس من يوم حنا صغار.. شي عجزت أغلب الناس إنها تفهمه في تعاملها مع بعض.. وهو إن كل واحد فينا كان متقبل الثاني بكل ما فيه من العيوب.. ولا عمر واحد فينا حاول يغير الثاني ويمشيه طريقته برغم الإختلاف الكبير بينا.. خالد كان فيلسوف بالفطرة بب علاقاته الكثيرة كنت أتعلم منه كثير.. لما أسأله كيف يقدر يجمع كل هالناس حوله كان يقول كلمات بسيطة لكن تركت فيني أثر كبير.. كان يقول: اسمع يا بندر.. الناس لها مشاكلها وكل واحد في هالدنيا صدقني منشغل في نفسه ولا أحد تهمه مشاكلك فإذا تبي الناس يحبونك.. انسى نفسك وفكر فيهم وكيف تساعدهم في حياتهم بقد ما تقدر.. قصتي الاساسية اللي أبيها توصلكم مو في كيفية صداقتنا.. لأني مهما شرحت ما راح أقدر أوصلكم مدى عمقها لكن الحدث اللي قلب حياتي ولا أظن ترجع زي ما كانت.. في يوم أربعاء جاني خالد للإستراحة اللي نجتمع فيها مع الشباب.. والفرحة مبينة في عيونه وسحبني من بينهم.. -تعال بندر أبيك في كلمة راس..لما صرنا برى.. -عندي لك مفاجأة.. وابتسم.. أنا ذاك الوقت اللي يشوف وجهي يقول خبل، أناظر فيه وفاتح فمي.. كمل كلامه: أبشرك الوالدة خطبت لي!! في هاللحظة حسيت كأن أحد عطاني كف وجهي.. -ايييييييييييييييييييش؟؟؟؟!!!!..طالعني بنفس طريقته يومه صغير واللي ما تغيرت أبداً.. -وراك تقولها كذا كنك مو مبسوط... وبإرتباك رديت: لا مبسوط بس أنت فاجأتني وصدمتني صراحة!! ما عمرك جبت طاري للزواج!!.. ضحك وهو يغمز: عارف.. بس الوالدة اقترحت علي الموضوع، وقلت لها مافي مانع.. توقعت إن السالفة كلام أو عالاقل بتاخذ وقت.. بس ما شاء الله عليها يومين إلا هي جايتني تقول ترى لقينا لك، الظاهر إنها حاطتها في بالها من زمان.. وبعدين ما عاد إلا خير وإلا وش رايك؟!!.. -يعني للحين ما شفت البنت ياخلّود.. -آفا عليك بس يابندر!!!اللحين أقول لك توي داري وجيتك بسرعة.. الوالدة تقول إنهم حددوا يوم الاثنين عشان أجيهم أشوفها... تفاجأت: الله بهالسرعة؟؟!!.. -مو أقولك شكل السالفة مطبوخة من قبل.. - كلا" الله يوفقك إن شاء الله... -عقبالك_ يالرَمَت_ ( خالد لما كان صغير كان يحاول يناديني بكلمة الرومّيت الانجليزية لكنه كان يقولها بهالطريقة ومشت معنا كذا صارت زي اللقب بيني وبينه ) اغتصبت ابتسامة: لا وين تو الناس علي المهم الحين خلنا نرجع للشباب لا يبدى التعليق.. وبتعجب ممزوج بغضب مصطنع رد خالد: لحظة لحظة بندروة.. اللحين أقول لك خطبت وزحمة ولا تعزمني شي بهالمناسبة؟؟!! الأقل ودني لكوفي شوب ياخي!! ضحكت: لا يا عمي.. اللحين قهوة وبعد شوي إلا إحنا في واحد من هالمطاعم حقتك اللي فواتيرها تكسر الظهر.. تراي أعرفك زين خلاص عشرة عمر.. رد: والله إنك قعيطي مستخسر فيني؟؟... وقعدنا نضحك.. حطيت يدي كتفه: ولا يهمك يا خالد إذا صار شي أكيد.. ابشر بذيك العشوة اللي يحبها قلبك في المطعم اللي تختاره وش تبي بعد؟؟!. "كان ودي أعزمه بس النفسية عدم".. رد بغمزة: ما تقصر أصيل يا بندر.. بس أهم شي لا تفشلنا مثل ذاك اليوم!!.. -افشلك!! متى ياويلك من الله؟؟!.. عطاني نظرة اللي مو مصدق: معقولة!! نسيت ذاك اليوم يوم يمدح لنا خوينا سامي ذاك المطعم قلنا لازم نجربه ونشوف.. لما تذكرت الموقف بديت أضحك: أوووووه.. الله يقلع شرك وش ذكرك بهالموقف الحين؟!.. ابتسم خالد ويده وجهه: تذكر؟؟ يومها طلبنا عصير وطقيت الصدر يعني إنت اللي بتدفع ويوم جا الحساب جت معه المصيبة.. والله لو إنك شايف وجهك يا بندر يوم شفت الفاتورة تقول صابين عليك موية باردة.. انحرجت.. -لا والله!! الأقل أحسن من اللي قعد يتفلسف ويسوي روحه أبو العُريف.. لا وتأشر بيدك بعد كننا في ملعب.. وبديت أقلد صوته ونظرته المعروفة: لو سمحت الفاتورة مو لنا، حنا طلبنا عصير بس!! والله لو إنك شايف وجهك أنت يوم رد عليك... "نعم يا سيد هذي فاتورة العصير بس" الحين من اللي طلع فشل الثاني؟!.. ابتسمت: أذكر ما بقى في جيوبنا شي ما طلعناه.. ويالله كفى ولقطنا وجيهنا وطلعنا وحنا نتصدد لا أحد يشوفنا.. وطوال ما كنت أعيد القصة وخالد ميت من الضحك.. كان يسعدنا إن حنا نعيد الذكريات اللي مثل هذي المهم رجعنا عند الشباب.. |
|
|
|
|
07-19-2008, 01:45 AM
|
#3 |
|
|
اسجل تواجدي ومتابعتي في أنتظار البقيه تحيتي لك ياقيثارة الحب |
|
|
|
07-19-2008, 01:50 AM
|
#4 |
|
|
ஐ الجزء الثالث ஐ
من بدا موضوع الخطبة حسيت إنه خلاص ما راح يرجع شي زي أول, تضايقت مرة بس ما أدري وش اللي فكرت فيه.. يعني مستحيل نقعد كذا بدون زواج للأبد كان واقع لازم أرضى فيه.. لما رجعنا داخل كان مستانس, يلعب, يضحك وينكت.. صحيح هاذي عادته لكن اليوم كان بزيادة أما أنا كنت عكسه تماما حسيت إني بأفقد هالأنسان.. ::الشخص الوحيد اللي اعتبرته صديقي:: جاني للبيت !! خفت يكون صاير شي.. ـــ خير خالد عسى ما شر.. عسى ما.. وبتوتر واضح في صوته.. أبد والله أحس إني متوتر شوي... ابتسمت له... يا ابن الحلال شدة وتزول زي غيرها.. ابتسم وقال...وش رأيك تجي معي؟!!... قعدت أطالعه أبي أتأكد إنه جاد.. أنت صاحي!! وين أجي معك؟؟!... ـــ طيب تعال وخلك في السيارة بس... شديت يده وحطيت عيني في عينه وقلت: يا ابن الحلال رح لحالك وأنا بأستناك في البيت طيب!!.. كان يطقطق أصابعه... ادع لي يالرمت... ـــ ما يحتاج قول الله يوفقك ويسنع دربك إن شاء الله, يلا عاد الحين رح وحلق وتكشخ تلقاك شهر ما دخلت الحلاق هالوجه... كنت أحاول أضحكه لأنه واضح إنه متوتر.. ـــ طيب أجي عندك عشان تشوف شكلي قبل أروح لهم... كتمت ضحكتي...إنا لله وإنا إليه راجعون؟!! إنت وبعدين معك ياعمي.. أصلا البنت أول ما تشوف عيونك بتوافق لا تشيل هم وتوكل ربك.. ـــ الله يستر ما أدري وش فيني خايف يا عمي؟!... ( كلمة يا عمي معروف إني دايم أقولها فإذا قالها خلود لي يعني خلك معي أو افزع لي زي ما تقولون كانت كلمات بينا ).. ـــ عادي كل العالم يتوترون في هالموقف بس أنت شد حيلك ولا تتأخر الجماعة... وطلع من عندي.. وبعد العشاء كنت أنا اللي ما أدري وش أسوي بعمري من التوتر وكل شوي أدق عليه لدرجة إن ريم أختي حاولت تهديني... ـــ ما صارت يا بندر يمكن أنت متوتر أكثر منه.. ــ يا ريم هذا خالد.. تعرفين يعني وشو خالد؟!.. هذا أقرب لي من نفسي... ــــ والله عارفة بتعلمني فيكم.. بس اذكر الله وهد الوضع شوي.. ما بقى عندي صبر وطلعت للشارع استناه, بعد حوالي الساعة شفت سيارته مقبلة بسرعة جنونية كالعادة.. لدرجة إنه بغى يدخلني تحتها لولا إني بعدت بسرعة.. نزل وشوي ويناقز من الفرحة.. وبرعب صرخت فيه.. ــــ خلووووود!!! أنت خبل بغيت أروح تحت سيارتك.. ناظرني نظرات جديدة علي وابتسم.. سألته..ها بشر؟؟ لمني الرجال وعرفت إنها دخلت مزاجه لدرجة إنه ما عاد يدري وينه فيه, المشكلة إنه يتكلم ولا فهمت من اللي قال ولا حرف.. كنت أعرفه عاطفي بس ما توقعت أنه يتعلق لهالدرجة وبهالسرعة.. فرحت له لما شفت كل هالسعادة فيه.. لكني بديت أتخيل وشلون بيصير حالنا بعد هالتغير اللي ما طرى بال؟!!.. يمكن تستغربون ليش كنت متخوف كثير؟!! بس صدقوني.،، لما يكون عندك إنسان موجه لك كل ذرة في كيانه وكل فكره معك ولفترة طويلة من عمرك.. وفجأة!!..يجي من يشاركك فيه,.. صدقوني تتلخبط حياتك ولو كانت المشاركة بسيطة.. وشلون لو جاء الإنسان اللي بيصير منافس لك؟! مو حب تملك لكنها عادة وغلا كبير.. قطع حبل أفكاري خالد وهو يقول: فكرة بندر في شي أبي أقول لك إياه.. وجهه وهو يقول هالكلام ذكرني بوجهه لما جا يعلمني إنه سرق شاهي وحليب من غرفة المدير وإحنا صغار،.. قلت بابتسامة: وش مسوي بعد هالمرة؟؟.. مسكني بيدي وجلسنا رصيف بيتنا حسيت الموضوع جد.. قال: صراحة يا بندر أنا ما قلت لهم إني أدخن؟!! لحظة قبل لا تقول شيء أصلاً هم ما سألوا إلا اليوم وانحرجت وقلت لهم لا ما أدخن خبرك خفت يرفضون... ـــ أفاا ليش يا خالد تبدى حياتك بكذبة تافهة؟!.. ـــ ومن قال لك إنها كذبة؟! أصلا أنا نويت إني أوقف سجاير... أنا لما قال لي كذا ضحكت!! تذكرت السنين اللي كنت أحاول فيه إنه يوقف وكيف إنه حاول كم يوم ولا قدر وفي الأخير لما أشوفه يعاني نستسلم.. لكن من عيونه واضح إنه كان مصر ومصمم هالمرة هالشي والله العالم.. ـــ بندر أكيد بيجون يوم ويسألونك أنت بالذات من بد الشباب عشان كذا حبيت أعطيك خبر.. ـــ مو شرط يا خالد بالعكس كثير ناس ما يفضلون يسألون الأصدقاء المقربين وطبعاً واضح السبب.. لكن لو جاني أحد وسألني عنك ما راح أكذب عليه.. بقوله هالكلمتين يالرمت: خالد صديقي من سنين وألف النعم فيه.. بس أنا متفق معه لما نتزوج محد يعطي معلومات عن الثاني عشان الإحراج.. لأن زي ما الواحد يقول الحسنات لازم يقول السيئات ما في كامل في هالدنيا.. هذا زواج مو لعبة وحنا ما نبي نضطر لهالشي.. بس إذا تبي العلم باختصار.. لو طلبني أختي عطيته إياها وهذا كل اللي عندي.. لما انتهيت من كلامي ربت كتفي.. وقال: ريحت بالي ما خاب ظني فيك يالرمت أنا أشهد إني عرفت من أخاوي.. توادعنا وركب سيارته, دخلت البيت وأنا أحس بضيقة شديدة.. صحيح دخلنا الـ 26 ذاك الوقت يعني طبيعي اللي قاعد يصير.. لكن ما أدري وش اللي كان صاير معي.. كان يكلمني كل يوم عن المستجدات اللي صارت.. ويسألني إذا كان أحد جاني من أهل البنت، وأنا أقول له للحين ما شفت أحد.. وحتى لما نتقابل طول الوقت يتكلم في هالموضوع.. بيني وبينكم بديت أطفش صار كل كلامه عن زواجه، لكن اللي معجبني في هالسالفة كلها.. إصراره ترك التدخين..!! صحيح حالته كاسرة خاطري.. يعني الصداع ما تركه أبد.. وعيونه دايم حمر.. ونفسه في خشمه طول الوقت..، والربع كلهم يحطمونه يقولون: أول ما تتزوج بترجع لا تتعب نفسك. بس في تقدم قعد أسبوع وشوي بدون ولا سجارة., كان مصر هالبنت وما يبي شي يوقف في طريقه.. وخالد صديقي واعرفه زين اذا حط شي في باله يجيبه |
|
|
|
|
07-19-2008, 01:56 AM
|
#5 |
|
|
ஐ الجزء الرابع ஐ
يوم الخميس.. زي عادتنا كنا مجتمعين أنا والربع في الإستراحة.. وخالد للحين ما جاء.. صار دايم يتأخر.. لكن عمره ما تركنا.. كنا جالسين.. بعضنا يلعب ورقة والباقين يسولفون.. أنا كنت ألعب.. وسمعنا صفقة الباب اللي برى.. وبما إن خالد اللي ناقصنا.. عرفنا إنه هو.. ::وبدأ التعليق:: اللي يقول: جانا العريس..!! والثاني يقول: الله يعينا عليه من أول ما وقف سجاير وهو نار شابة..!! قلت لهم: كلش إلا خويي عاد لحد يغلط عليه وأنا موجود... وقعدنا نضحك.. فتح باب الغرفة.. والتفت أسلم عليه.. ما حسيت إلا واحد يرفعني من القلابي ويلزقني عالجدار بقوة.. لما حاولت أعرف من هو؟!.. إلا هو خالد..!! كان معصب ويصرخ في وجهي ويدفع جسمي عالجدار بطريقة عنيفة، كنت مصدوم.. وأطالع فيه مو فاهم وش اللي صاير؟!.. حتى ربعنا يطالعون بتعجب..!! ولما استوعبوا إن السالفة هوشة قاموا يفكونه عني.. في هاللحظه انا للحين ما بعد استوعبت الموقف.. بس يوم شفتهم يسحبونه عني.. حسيت إنهم أوجعوه.. بديت ابعدهم معه وأحاول أحميه بيديني.. كنت خايف عليه.. وجسمه صار أحمر من تسحيبهم الشديد.. وأنا لهاللحظة ما أدري وش صاير؟!.. لكنهم كانوا أكثر منا وقدروا يمسكون كل واحد في جهة.. سامي كان يسأل خالد بعصبية: أنت صاحي؟!! وش جاك أنهبلت؟!وش صاير؟! ورد خالد بصوت إنسان ثاني ما أعرفه ــ وياليته ما تكلم ـــ: اسأل هالجبان اللي قدامكم وش سوى لا تسألوني أنا؟!.. في هالوقت بديت استوعب الموقف.. خالد قدامي في حالة عمري ما شفته فيها.. معصب والكلام يطلع مقطع منه.. بسبب تنفسه السريع.. نظرته ما غيرها تطل من عيونه.. بس الحقد حل محل البراءة.. كان كل شوي يحاول يتخلص من يدينهم عشان يضربني!! تصوروا!! بعد كل هالعمر وهالعشرة يضربني أنا.. بندر.. عمره.. ورفيق دربه.. قلت له وأنا احاول أقرب عنده أهديه:وش بلاك يا خالد أنا وش سويت يا خوي؟! رجع يحاول يتهجم علي وأبعدوني عنه بسرعة.. ــ لا تقول يا خوي أنا لاني أخوك ولا أتشرف أكون أخوك.. وبصوت تخالطه البحة من شدة الصراخ وهو يمسك راسه بين يدينه بعصبية.. ــ وبعدين لا تقول وش سويت يا حقير لا تنرفزني زيادة... خفت عليه كان يصارخ ما يتكلم ويطلع كلامات زي السم... ــ لما ما تكون قد الكلام اللي تقوله لا تقعد تتفلسف علي يا أكبر كذاب.. قال سامي: خالد وش هالكلام؟!! كبر عقلك وخلنا نفهم القصة... صرخ فيه.. أنتم لا تتدخلون.. ورجع يطالعني وهو يضرب صدره بقهر واضح.. ــ أنت ما شفتني أموت في اليوم عشرين مرة؟!.. وأنا أحاول بكل ما فيني إني أوقف سجاير ليش تقولهم إني كنت أدخن ليش؟!.. كنت هاللحظة زي الغبي وعيوني بتطلع من مكانها.. رديت.. خالد أنا قلت لك محد جاني ولا احد سألني............. كلامي زاد ثورته.. وقام يتحرك زي المجنون.. ـــ هذا اللي يبي يذبحني.. بندر لا تكذب لا تكذب.. ما أبي اسمع منك ولا كلمة.. صحيح إنهم رفضوني.. بس ما يهم البنت بدالها ألف.. وبدت نبرة صوته تخف حدتها.. ـــ لكن أنت ليش سويت كذا يا بندر ليش؟! الكلام اللي قلت لي ذاك اليوم كان كله كذب وتمثيل؟!! الأقل ليش توعدني وتخلف؟!.. لو قلت إنك بتعلمهم كان تفهمت الموضوع.. أنت حطيتني في أصعب موقف.. معقولة استخسرت السعادة اللي أنا كنت عايشها.. ولا قدرت تستحمل فكرة إني أبعد عنك شوي!! معقولة يا بندر..!! أنت من بد هالعالم كلهم تسوي فيني كذا هذا جزاي إني عزيتك؟؟!.. رجعت النبرة العالية.. ــ ما توقعتك كذا أبداً.. أنت إنسان أناني.. تعرف يعني إيش أناني؟! حاولت أتمالك نفسي ورديت بصوت هادي قد ما أقدر... ــ بس لا تكمل.. لا تقول كلام تندم عليه بعدين يا خالد.. لا تظلمني وأنا أخوك... ضحك بسخرية..أندم!! أندم إيش وإلا إيش؟! العشرة الحلوة اللي كانت بيننا؟!.. وإلا 16 سنة اللي ضيعتها من حياتي واحد مثلك؟!.. وإلا عالإنسان اللي توقعته صديقي وما طلع........... وقبل ما يكمل كلمته.. هالمرة أنا اللي تخلصت من يدينهم وهجمت عليه ورميته عالأرض.. ولما ثبته تحتي.. رفعت يدي لكنها وقفت وكل عضلة فيني ترجف رجفة فظيعة.. لأن اللي تحتي كان خالد.. خالد الرفيق..!! خالد الغالي..!! يا رب أنا وش قاعد أسوي.. معقول أمد يدي عليه؟! صرخت في وجهه.. اسمع يا خالد.. كل الكلام اللي قلته ممكن اتغاضى عنه عشان المعزة اللي لك بقلبي.. ولاني متأكد أنه فيه سوء فهم في الموضوع.. أما إنها توصل فيك إنك تقول اللي بيننا ما كان شي فهذا اللي ما راح اسمح لك تقوله فااااهم؟!.. خلص يدينه من يديني ودفعني من فوقه.. ــ أقول أبعد عني بس... وقف وأنا للحين الأرض... ــ اسمع يا بندر هي كلمة و رد غطاها.. ما عاد أبي أشوفك ولا عاد أبي اسمع صوتك أو حتى طاريك.. وكل اللي كان بيننا.. اليوم انتهى.. الانسان المخادع اللي ما يقدر الصداقة ماله مكان في حياتي أبد.. واذا كنت سويت هالحركة خايف إنك تفقد جزء مني يا طفل.. أبيك تدري اللحين إنك فقدتني للأبد.. طلع من الاستراحة بنفس الحال اللي دخل فيه.. واشرت لسامي وأنا أحس بإرهاق شديد: اطلع معه الله يعافيك.. لا يسوق السيارة وهو هالحال.. بعد هو مب ناقص جنون في السواقة.. لكنه رجع بعد دقايق يقول إنه ما قدر يلحقه.. انتشر الهدوء بعد طلعة خالد.. وكانوا كلهم يطالعوني مو عارفين وش يقولون.. كانوا مصدومين مثلي وأكثر.. وقفت ويدي قلبي.. حسيت إني مخنوق وأنا أحاول استجمع القوة اللي باقية فيني.. قلت: عذراً يا شباب.. متأسف الفصل البايخ اللي صار قبل شوي.. يلا أنا ماشي... سألني سامي بتردد واضح: لحظة قبل ما تمشي يا بندر.. صحيح الكلام اللي قاله خالد؟! هزيت راسي بأسى وأنا أمسك دموعي اللي عصتها شيمة الرجال.. وبابتسامة رديت:ليش استغرب منكم إنكم تصدقون هالكلام فيني إذا كان خالد خوي الروح قدر يصدقه؟! مع السلامة.. وطلعت.. لحقني سامي... ـــ خلني أوصلك للبيت يا بندر تراك طريقي... شكله حاس بتأنيب ضمير وراحمني وهذا اللي ما أحبه.. رديت... لا مشكور أنا بخير لا تشغل بالك... وركبت السياره ومشيت.. في البيت.. الوالدة وريم كانوا في الصالة لما دخلت.. واستغربوا رجوعي بدري.. بعد السلام سألت الوالدة باهتمام: بندر يمه وش فيك؟!... ريم بعد قالت شي زاد الالم اللي في قلبي: عسى ما شر يا بندر خالد فيه شي؟؟؟... حاولت أمثل إني معصب.. إنتِ ما تفهمين؟!! كم مرة أقولك يا رويّم لا تتفاولين العالم... يا جماعة كل اللي صار إن إحنا تفرقنا بدري الليلة عادي وش فيكم؟!... قالت الوالدة... يا ولدي وجهك متغير أنا أمك وأحس فيك.. قل لي يا أمي من اللي مضيق صدرك؟!.. قالت ريم: لا يكون متطاق مع واحد من العيال؟؟.. قالت أمي.. وش دعوى ما تعودنا منك يا وليدي هالحركات؟!! كنت عارف إن شكل ثيابي يدل إني توي طالع من هوشة... قلت لهم: ريحوا بالكم تهاوشت مع واحد من الشباب بس جت سليمة خلاص عاد فكوني.. قالت ريم: أكيد بتجي سليمة إذا كان خلود المرعب أبو المشاكل هو اللي دايم يفزع معك المفروض محد يقرب لمك.. هزت راسها كنها تذكرت شيء مو حلو... ــ يمممه منه ذاك الولد شراني يا كثر ما صيحني وحسرني وحنا صغار.. تذكرين يمه ذيك الأيام؟!.. ابتسمت أمي... أول سنتين من نقلنا للرياض ما كنت أربط شعرك.. دايم تجيني تصيحين من تمعيطه لشعرك.. قالت ريم: وتضحكين بعد يمه.. المشكلة إن ولدك ذا كان يطقني معه.. ما كأني أخته الحمد الله والشكر... قالت أمي: صحيح إن خالد كان شيطان وهو صغير.. بس والله إن الولد والنعم فيه.. شوفي وش صار اللحين... آلمني كلامها زيادة بس سويت الوضع عادي.. ووجهت كلامي لريم.. ـــ وإنتِ وش تبين ما عندك إلا خالد وخالد؟!.. بعدين تستاهلين رازة وجهك عند العيال في الشارع دايم وهو معتبرك أخته... حسيت إني أحرجتها.. وردت.. أنا وإلا أنت اللي ما عنده إلا خالد؟!!.. قطعت الحوار و رحت لغرفتي... |
|
|
|
|
07-19-2008, 01:58 AM
|
#6 |
|
|
ஐ الجزء الخامس ஐ
قعدت في فراشي استرجع اللي صار.. معقولة خالد يسوي معي كذا ويقول عني هالكلام.. وبدون حتى ما يفكر وقدام هالعالم كلهم؟!! لا أكيد أنا أحلم.. أصلا اللي شفته اليوم إنسان ما أعرفه!!! ورغم الإهانة اللي كنت أحس فيها والجرح اللي في قلبي.. إلا إني دست مشاعري.. ورحت أدق عليه.. لازم أفهم وش اللي مضايقه لهالدرجة ليش؟؟ لأنه مو أي واحد.. لكنه للأسف عطاني مشغول بعدين قفل جواله!! جلست في بيتنا ثلاث أيام لا رحت للاستراحة كالعادة ولا استقبلت مكالمات من أحد حتى أهلي مستغربين.. لكن لأن طبعي كتوم ما قدروا يعرفون أي شي.. كانت هذي أول ثلاث أيام ما أشوف خالد فيها وأحنا في نفس المكان.. مرت علي كأنها ثلاث سنوات.. ورغم اللي سواه معي إلا أنه وحشني حيل.. واشتقت له ذاك الشوق اللي تحسه يوجعك مو بس نفسي إلا تحس شيء يألمك من جد إذا فاهميني!!! لكنه الله يسامحه ما حاول يعطيني أي فرصة عشان اتصل عليه.. اتصلوا الشباب من الاستراحة وكانوا حاطينه عالسبيكر.. وسلموا علي وسألوا عن أحوالي.. عاد واحد منهم اسمه ماجد قال: وينك من زمان عنك يا رجال كبر راسك علينا.. وإلا عشان خويلد ما عاد يجي صرت أنت بعد ما تجي؟!.. سمعت كأن أحد ضربه وسكته.. المهم قلت:معليش يا شباب أنا هاليومين ما أعتقد إني بجي للاستراحة.. مالي نفس سامحوني.. قال سامي: وش رأيك نجيك للبيت إذا ما عندك مانع؟!... استغربت بس رديت.. بالعكس حياكم الله أي وقت البيت بيتكم... ـــ خلاص إذا شفنا يوم مناسب نبي ندق عليك... ـــ خير إن شاء الله.. الله يحييكم في أي وقت... مع السلامة.. بعد شوي دق خالد!!!!!!!! معقولة ماني مصدق عيوني وش القصة؟! قعدت ساعة أطالع الأسم أبي أتأكد إنه فعلا هو.. لكن للأسف.. سويت شي بأظل ندمان عليه طول عمري.. عطيته مشغول وقفلت الجوال.. ليش سويت كذا؟!.. ما أدري.. أظن إنها كانت ردة فعل طبيعية بعد اللي صار لي معه.. وما أعتقد أحد يلومني.. يمكن أبي أرد له اللي سواه.. أو كنت عارف لو رديت إنه بيكون لي فضل عليه.. وهذا اللي ما أبيه.. المهم هذا اللي صار.. لكن الوضع استمر صار يدق علي وأنا ما أرد.. كنت أعاند قلبي قبل لا أعانده هو.. صار يرسل مسجات يترجاني فيها إني أرد.. لكن اللي فهمته من بعض المسجات أنه يبيني أسامحه.. لأنه أكتشف إنه غلط بحقي ومن هالكلام اللي خلى عنادي يزيد... بعد يومين دق علي طلال أخو خالد الكبير.. هو بعد صديق عزيز.. يجلس معنا من فترة لفترة في الاستراحة.. وكنت أغليه من غلا أخوه وأحترمه كثير ولا قدرت أصفطه (أسفهه) رغم إني عارف سبب المكالمة.. ورديت: مرحبا طلال... ـــ هلا وغلا وش أخبارك وعلومك يا بندر؟... ــ أبد والله تمام... أنت أخبارك وأخبار الأهل؟... ـــ تسلم كلهم تمام, بندر يا خوي!!.. ـــ ســـم؟... ـــ سم الله عدوك.. أنا داق عليك عشان موضوع خالد.. أنا عارف إنك ماتبي أحد يتدخل في الموضوع.. حتى خالد مو راضي يتكلم.. أنا عرفت من الشباب.. وفكرت كثير قبل أكلمك.. لكني ما قدرت أشوف حالة اخوي كذا.. وأصفط يديني.. الصراحة من ذاك اليوم وهو مو خالد اللي نعرفه.. لا يروح ولا يجي ماعاد يسولف ولا يضحك.. حتى الاكل دايم ما يشتهي!!.. والوالدة ضايق صدرها عليه تحسب أنه زعلان البنت.. وتقول لأخواني وين بندر عنه محد بيوسع صدره إلا هو!!.. صار طول الوقت في غرفته خاصة لما عرف إنه مالك يد في اللي صار.. وليتها جت كذا... خالد رجع يدخن بعد بس هالمرة بشكل يخوف يا بندر... قلبي انقبض.. بس رديت... والله يا طلال أنا مقدر موقفك وخوفك أخوك وأعرف إن قلوبكم بعض دايم.. وصدقني آخر شيء أتمناه إن خالتي يضيق صدرها.. وإنت عارف زين إني أعتبرها أمي الثانية.. لكن أنا ما غلطت معه أبد.. هو اللي جاني ونسف كل شي حلو كان بيننا في لحظة غضب... ـــ طيب ما تبي تعرف وش القصة وليش خالد سوى معك كذا؟.. ـــ مهما كانت القصة ما تعطيه الحق إنه يسوي اللي سواه.. ترانا ما عدنا صغار وأنا أخوك.. بالله هذي طريقة يعاملني فيها؟!! والله إني ما شفته يسوي كذا مع الناس اللي كان يتهاوش معهم وهو مراهق.. خالد قدر يقول عني كلام يجرح بدون ما يراعي أي شي.. ويصدق فيني كذبة بدون حتى ما يعطيني فرصة أدافع عن نفسي... تنهد طلال.. ــ ياخوك اللي صار.. إن أهل البنت قبل لا نحدد الملكة.. رفضوا فجأة.. يقولون إنهم عرفوا أنه يدخن.. أو الأقل كان يدخن.. ولا عندهم استعداد إنهم يجازفون.. ومن ضمن الكلام فهمنا إن اللي قال لهم بندر.. وأنجن خالد لما سمع اسمك كان مصدوم وقعد يصارخ يقول كيف يسوي فيني كذا وهو وعدني؟! وطلع وصار اللي صار لكن اللي فهمناه بعدين إنه طلع بندر ولد جيرانا.. بس تبي الصراحة.. محد من أخواني جاء باله.. كلنا رحنا لك طول لما سمعنا الاسم... ضحكت بتعجب وأنا أقول في قلبي "هذا الشيء التافه هو اللي خلاك تظلم خويك يا خالد؟!!" رديت طلال: والله هذا مو ذنبي ولا هو عذر للي سواه معي.. خالد ظلمني وكسر في داخلي شي عمره ما يتصلح.. والله أنه غالي وأنا مسامحه يا طلال ولا أبي شيء منه.. بس صدقني ما أقدر.... وحسيت إني ما عاد أقدر أكمل... بنبرة هادئة رد طلال: كلٍ.. أنا حبيت أفهمك اللي صار.. وأنتم رجال وفاهمين وش تسوون.. وأنا ما أقدر ألومك شيء.. بس هذا أخوي يا بندر ولازم أحاول أسوي أي شي... ــ اعذرني يا طلال ياليتك جيتني في شي ثاني والله رقبتي سدادة ... ـــ أصيل ما تقصر يا بندر أشوفك خير... ـــ مع السلامة... لما عرفت التفاصيل ضاق خلقي زيادة.. كنت أتمنى إن الموضوع يكون أكبر.. يعني معقولة يسوي كل ذاك الفصل عشان تشابه أسماء؟! شي يحز في الخاطر صراحة.. صحيح إن خالد معروف عنه إنه عصبي ولا يقدر يضبط نفسه.. بس هالكلام المفروض ما ينطبق علي.. الأقل مو بهالطريقه اللي صارت!! باختصار حسيت إني مثلي مثل غيري بالنسبة لخالد... في اليوم الثاني.. جت الوالده تصحيني الساعة 10 الصبح... ــ يمه بندر أصحى خالد عند الباب... كنت متوقع إن هالشي بيصير وحاسب حسابه.. ـــ قولي له نايم... قلتها وأنا أغطي راسي بالبطانية.. حاولت تسحبها من فوقي... ـــ يووووه أقول لك خالد عند الباب وش بلاك يا ولدي.. علا صوتي شوي... ـــ عارف إنه خالد سمعتك من المرة الأولى وأنا أقول لك نااااايم... تعجبت الوالدة من تصرفي لأني أول مرة أسويها.. لكني ما عطيتها فرصة عشان تستفسر.. طلعت من غرفتي وأنا نطيت من فراشي للشباك طول.. كنت أشوف سيارته لكن ماقدرت أشوفه.. حاولت منا ومنا ما فيه مجال.. صار يمر بيتنا يومياً الظهر والليل وأنا أتهرب منه وأصرفه ولا عمري طلعت له.. ودروا أهلي إن بيني وبينه شي.. أصلاً واضح ما يبي لها ذكاء.. أما جوالي صار مايسكت سواء مكالمات من خالد أو من الناس اللي يحاولون يصلحون بيننا.. ومسجات طول الوقت حتى إذا قفلته وفتحت الثاني.. أو سوا كان يدق عليهم طول.. ما أدري ألعب مين..؟! هذا خالد اللي يعرفني زين.. ويعرف كل أرقامي وحتى لو كان عندي رقم محد يعرفه.. فهالكلام ماينطبق عليه.... |
|
|
|
|
07-19-2008, 02:01 AM
|
#7 |
|
|
ஐ الجزء السادس ஐ
ذاك اليوم.. اشتقت له.. ورجعت بي الذكريات لأيام الابتدائي.. ويا كثر المواقف اللي حصلت لنا.. لأن اللي يصادق واحد مثل خالد تتحول حياته لمغامرة..، مره في الصف السادس ( إذا ما خاب ظني ) كان الاستاذ مسوي مسابقة.. اللي يفوز بيصير"العريف"اللي ينظم الفصل إذا ما كان الأستاذ موجود..!! والله أيام وحشتني.. المهم أنا كنت ميت عشان أصير هالعريف.. أجي بدري.. وأشارك.. وصاير مؤدب "ثقيل دم قولة خالد".. كان ما يحب الاشخاص اللي مثلي يهتمون بالدراسة.. ويحبون المدرسين.. أو يتمصلحون عندهم قولته.. بس سبحان اللي جمعنا مع بعض.. كان يقول...ليش تبي تصير عريف؟!! ترى العيال بيكرهونك.. ما اهتميت لكلامه ورديت..أبي أصير كيفي!! بعدين يا غبي بخليك تطلع وتدخل كيفك.. ـــ لا مو لازم أنا أسوي اللي أبي حتى لو ما كنت أنت العريف... المهم قبل لا يختار الأستاذ بيومين شريت بلونات وجبتها للمدرسة..، خالد كان مريض و غايب.. بس أنا والشلة رحنا ومليناها موية.. وأول ما انتهى الدوام رميناها من فوق وانحشنا..، يمكن بتقولون وين الولد المؤدب..؟!! لكن أنا بعد خالد صارت تجيني طلعات.. توقعت الموضوع محد بيدري عنه.. لكن من بكرة أول ما جيت الصبح.. قالوا لي العيال إن الأستاذ يسأل عن اللي جاب البالونات وسوى الحركة اللي أمس..، هنا أنا قلت العريف السلام، هالاستاذ مايصدق..، رحت لخالد اللي متجمعين عليه كل العيال بما أنه كان غايب أمس..، علمته باللي صاير.. وهو يدري أنا وش سويت أمس.. لأني قلت له السالفة وإحنا جايين للمدرسة..، قال: خلاص ولا يهمك أنا أتفاهم مع الأستاذ.. كنت أعتمد عليه كثير..، لما بدت الحصة.. دخل الأستاذ.. وبنبرة كانت تخلينا ننتفض.. اللي رمى البالونات أمس يوقف.. محد رد في البداية.. كان ماسك مسطرة وش كبرها الله يسامحه.. ـــ شوفوا لو ما تكلمتوا بعاقب الفصل كله... ناظرت خالد وأنا بموت من الروعة.. ابتسم وغمز لي بعدين وقف... ـــ أنا يا أستاذ... قالها كأنه محرر القدس..!! قرب الأستاذ من عنده وسحب أذنه... ــــ والله إني عارف إنه ما في غيرك يا خالد يسوي هالحركات.. أنت متى بتعقل؟!.. ليش ما تصير مثل أخوانك أو مثل صديقك بندر؟!.. جننتني معك يا ولد!!... الصراحة.. ما توقعت إن خالد بيتحمل اللي صار بدالي؟؟! فعلا كنت مستغرب.. والدليل إني قاعد إتفرج وهو يتعاقب وأنا ساكت!! طبعا الأستاذ كسر المسطرة يدينه يا حرام.. وأنا أحس إن عقلي بيطير من المنظر.. بعدين وداه للمدير...في نفس الحصة.. اختارني الأستاذ عريف.. وطبعاً ما تهنيت بالخبر.. لأني ما أدري وش صاير مع خالد ذاك الوقت.. لما انتهت الحصة.. كان واقف قدام غرفة المشرف وحوله بعض الاولاد.. يوم شافني.. ركض ولمني:...أحلــــــــــــى أخيراً وصلت اللي تبي مع وجهك... أنا ما كنت أقدر أتكلم.. أشوف يدينه حمر من الطق.. ويفركها جسمه.. ووجهه الأسمر تخالطه حمرة بسبب المرض وهو يضحك... قلت وأنا متنرفز يمكن من الأحراج: ...خالد ليش سويت كذا..؟! أنا ما قلت لك........ قاطعني:.يا ابن الناس يعني أول مرة أنطق.. خلاص مشها يلا لازم نحتفل اليوم... من بعد اللي صار.. عمرنا ما تكلمنا عن هالسالفة.. شكله نساها أو ما اعتبرها شيء.. بس عمري ما نسيت ..صحيح إننا كنا صغار لكن فزعته هذي لا يمكن أنساها... هالذكريات شوقتني له.. و رحت أتفرج صورنا و أشرطة الفيديو.. أعجبني كيف كنا مرة قريبين من بعض.. ولا في مكان يطلع فيه واحد إلا الثاني جنبه.. أغلب الاشرطة ما قد شفتها من قبل.. كانوا حوالي العشرين شريط.. شي لسفراتنا.. وشي لطلعات البر.. وكلها شفتها في يوم واحد ورى بعض.. اكتشفت اني طول الوقت أطالع فيه هو.. حتى في الصور عيني عليه بس.. وطوال وقت عرض الأشرطة وأنا أضحك عليه.. كان بطبعه خفيف دم.. محد في هالدنيا يخليني ابتسم أو أضحك أو حتى يجنني مثل ما يسوي.. واحد من الأشرطة كان فيه مقطع أثر فيني كثير.. كنا مخيمين في الصمان.. واحد من الشباب يصور ومعه خالد.. مروا أغلب الشباب.. اللي ينصبون الخيام.. واللي ينزلون الاغراض.. وخالد كان ماخذ دور المقدم عشان يتهرب من الشغل كالعادة.. هو واللي معه وقعد يسوي مقابلات معاهم ويستهبل عليهم.. وأنا أضحك طول الوقت طريقة كلامه وتعليقاته.. لما جا دوري.. كنت قاعد أشب الفحم ومعطيه ظهري.. قرب مني... ـــ عاد جينا اللحين لأغلى إنسان... كنت مشغول باللي معي: هلا هلا خلود.. مسوي فيها مذيع يعني؟!! ما ودك تساعدني بدال هالخرابيط.. أزعجت العالم يا عمي... كان يوجه كلامه للكاميرا وحاط يده ظهري.. وأنا مو معطيه وجه.. ـــ هالولد اللي تشوفونه عرفته من يوم إحنا صغار.. عزيز وغالي علي ولا أبدله بكنوز الارض... قاله اللي يصور: ما أقدر أنا هالكلام!! يا بعدي هاللي أنت كاشخ فيه وتمدحه من الصبح حتى ما عطاك وجه وأنت تتكلم... طالعني بنظرات ما انتبهت لها ذاك الوقت كانت تحمل معاني حلوة... كمل كلامه..والله لو إيش يصير ما يتغير شي من غلاه... تجمعت الدموع وأنا أسمع كلامه.. مع إني ذاك الوقت واضح إني ما انتبهت لـ أي كلمة.. جتني مشاعر متضاربة كنت أقول في نفسي "كلام رائع لكن ماطبقته ياخالد باللي سويته فيني".. سكرت الفيديو ورحت انام.. أو بالاصح أحاول أنام.. |
|
|
|
|
|
| مواقع النشر (المفضلة) |
| الكلمات الدلالية (Tags) |
| بنــدر, خالـــد, قصة |
|
المنتدى الإسلامي | أناشيد إسلامية | منتدى الصور
منتدى صور الأطفال | العجائب والغرائب | القصائد و الأشعار | الخواطر | قصص و روايات | أزياء وفساتين
أطباق - مطبخ حواء | الديكور و المنزل | منتدى الصحة | عالم الجوال | فيديو للجوالات | ثيمات وصور للجوالات
الكمبيوتر | البرامج | برامج عربية و إسلامية | برامج حماية و مكافحة فايروسات | تحميل الماسنجر | توبكات ماسنجر
أيقونات و إبتسامات للماسنجر | صور للماسنجر صور مسنجر | منتدى النكت | الصور المضحكة | منتدى الرياضة | سيارات
| إبحث في كامل شبكة الهنوف العربية |
