بسم الله الرحمن الرحيم
.
.
.
..
..
" الجزء الأول "
راكان & مشعل
..
..
..
{ عائلة راكان }
الأب :- أبو فيصل .. رجل أعمال ..
الأم :- أم فواز << وش رايكم أكيد " أم فيصل "
فيصل :- مهندس مدني .. وتوّه متزوج .. والرجال تكانه ..
فواز :- موظف بالإتصالات السعودية .. وياحبه للكشخه ..
راكان :- طالب في المرحلة الثانوية .. و 24 ساعة مع صديقة مشعل ..
نوره :- تدرس سادس / ج .. ومن هواياتها " تعرف تسوي أندومي " ..
{ عائلة مشعل }
الأب :- أبو مشعل .. دكتور ..
الأم :- أبو مشعل بعد وش رايكم أكيد أم مشعل << 2 / 0
حصه :- معيده بالجامعه ..
ودافوره بالدراسة .. حتى معدلها ماعمره نزل تحت 4.75 << أهب دافوره
شوق :- تدرس ثاني جامعه .. قسم انجليزي
مشعل :- طالب بالمرحلة الثانوية .. و24 ساعة مع صديقة راكان
نوال :- تدرس خامس / ب .. وتحتك بنوره أخت راكان ؛ ليش ؟
علشان تعلمها كيف تسوي أندومي
" في الصباح "
راكان كالعاده يروح للمدرسة بدري ..
يجلس بالساحة ويحل الواجبات اللي عليه
وينتظر صديقه مشعل ..
مشعل يروح للمدرسة متأخر شوي ؛
لأنه من النوع اللي اذا نام نام
مايقوم غير بطلعة الروح ..
أمه تحجرله من الساعه 5.30 الفجر
ياوليدي قم
يابن الحلال قم
مشعل ياوليدي قم
ياشين قم مابقى وقت
وهو مفهي وناااااااايم
وبعدها تضربه على راسه وتقوله :
قم قم قم قم قم قم قم
واذا قام يتقلب بفراشه يمين ويسار
تقوله العجيّز :
اختر الحل الصعب ..
ياأجيب عليك سطل مويه وأرشقه بوجهك .. ياتقوم وأنت رجال كويس
يتقابل مشعل مع راكان بالساحه
ويدقونها سواليف لين مايحركون للفصول ..
بالفصل يجلسون بمكانهم المعروف ..
قبل الأخير على اليسار تحت المكيف ..
راكان يحب مادة الرياضيات ..
وأساذ حسني << هذا مدرس الرياضيات كان يقدّر راكان تقدير ملعون أبو خيّر
لأن راكان هو الطالب الوحيد اللي معطي المدرس وجه بالحصه
وكان يتابع معاه زين ..
وإلا مشعل والباقين .. كانوا : إما نوم أو يحذفون بعض بالمغاطيات
والمدرس المسيكين مابيده شي ..!
مشعل يقّدر مادة الإنجليزي ..
وكان هو الطالب الوحيد بالفصل اللي يرطن انجليزي كويس ..
لأنه عاش ببريطانيا ..
لمّا كان أبوه يحضر للدكتوراه ..
وكان أكثر طلاب الفصل يكرهون مشعل !!
يمكن علشان انه كان مميز بالإنجليزي
وطبعا ً بحصة الإنجليزي كان راكان يروح يتقهوى عند المرشد الطلابي ؛
لأنه كان غاسل رجله من حصة الانجليزي
<< ترى راكان خطير ومضبط مدير المدرسة براسه
<< لا تنسون ان أبوه تاجر
في حصة الأحياء صار موقف بالفصل
فجأة والمدرس يكتب على الصبورة ..
طلع صوت " واحد يصفّر بالفصل "
والفصل قاموا يضحكون
ويوم التفت المدرس وهو معصب وقال :
من اللي صفّر ؟؟
والفصل ساكتين وهاجدين
رجع المدرس وسأل .. من اللي طلّع الصوت ؟؟
وللحين الطلاب كاتمين الضحكه وساكتين
المهم طلع المدرس وقال دقايق وجايكم .. وصدقوني راح أطلع اللي صفّر
طلع مدرس الأحياء ورجع للفصل وجايب الوكيل معاه
الوكيل كان سياسي ..
طلّع مدرس الأحياء برى الفصل وسكر الباب !!
وجاب أوراق وقطعها على شكل مربعات صغيرة شوي ..
ووزعها على كل طلاب الفصل ..
وقالهم :
الحين أبي من كل واحد منكم يكتب لي أسم اللي صفّر ..
ولا أحد يكتب أسمه على الورقه ؛ علشان مايحط في باله أي خوف ..
يعني مجرد كل واحد يكتب لي أسم اللي صفّر وبس ..
وصدقوني ماراح أسوي له شي ..
لاكن أبي أجيبه عندي بالمكتب ..
وأبيه يعتذر من مدرس الأحياء ؛ لأنه زعلان من الحركه هذي ..
قالهم يالله كل واحد يكتب لي سم اللي صفّر ويصفط الورقه وأنا أمر عليكم الحين وأجمعهن ..
وخلال دقيقتين مر عليهم الوكيل وجمّع الأوراق ..
وقالهم مابي أسمع ولا صوت ..
شوي وجايكم ..
الطلاب باللحظه هذي كانوا يناظرون بعض ..
وكل واحد منحرج من الثاني وماوده يقول من كتب ..!
المهم بعد 10 دقايق دخل الوكيل ومدرس الأحياء للفصل ..
وقال يا شباب اللي أنادي أسمه يطلع عندي هنا ..
فجأه سكت الفصل .. وكان فيه خوف من الجميع ..
اللي مو خايف على نفسه .. كان خايف على خويه ..
قال الوكيل :
مشعل يطلع عندي هنا !!!!
مشعل انصدم بالموقف هذا
وقال أنا يا أستاذ ؟
قال ايه أنت يامشعل ..
مشعل لا إراديا ً قال : قسم بالله يا أستاذ أني ماصفّرت
قاله الوكيل : لاتحلف ولاشي ..
الحين أنت صادق وأخوياك يكذبون ؟!
مشعل وقتها أخنقته العبره من الموقف هذا
وطلع وهو ساكت ..
ومع الأسف طلع كلام الوكيل غير صحيح يوم قال ماراح أسوي شي للطالب ..!
راكان خوي مشعل باللحظه هذي كان منقهر لأن مشعل مظلوم ..
وكان يترقب وش راح يصير على صديقه ..
كان العقاب اللي حاطه الوكيل هو :
خصم درجات بالسلوك ..
وخصم درجات بمادة الأحياء ..
وجلد قدام زملائه بالفصل ..
(( على فكرة : الوكيل ماهو قاصد أنه يظلم مشعل ؛ لاكن أكثر الأوراق جته بإسم مشعل !! ))
يوم راكان شاف قرار الوكيل ..
كان ودّه ينقذ أعز أخوياه .. خاصه وأنه مظلوم ..!
قام برجوله وقال :
يا أستاذ اللي صفّر أنا مو مشعل ..
الوكيل قال :
وش تقول ياراكان ..؟
راكان قال :
يا أستاذ أنت ماتحب الظلم ..
وأنا ماودي أنك تظلم مشعل ؛ لأنه ماصفّر .. وأنا اللي صفرت ..
علشان كذا ماأرتاح ضميري .. وحبيت أعترف أنه أنا ..
الوكيل قال لمشعل :
خلاص يامشعل رح وأجلس بمكانك ..
وتعال وراي للمكتب ياراكان ..!
" الجزء الثاني "
طلع راكان لمكتب الوكيل ..
وكان فيه ولي أمر طالب ينتظر الوكيل بالمكتب
علشان كذا الوكيل قال لراكان خلك واقف برّا
لين ماأنادي عليك
بعد ماطلع الرجال من مكتب الوكيل
نادى الوكيل راكان
وقاله أدخل وسكر الباب
راكان ماكان خايف ؛ لأنه ريح ضميره وأنقذ زميله
الوكيل محط راكان بمحاضرة عن أحترام المدرسين
ولازم ان الطالب لو يكره المادة ومايشارك .. أقل شي يكون ساكت بالفصل ..
وراكان كان مدنّق راسه ويسمع كلام الوكيل
المهم بعد ماعطاه محاضرة قاله :
ياراكان أنا أعجبني موقفك الرجولي بإعترافك قدام زملائك
وعلشان كذا .. راح أسامحك .. ولاكن توعدني أنها ماتتكرّر
راكان بوناسه قال :
أبشر والله ومن عيوني يا أستاذ
رجع راكان للفصل .. وهو قاعد يمشي بالسيب جته فكرة ..
قال أبي أكلّم المرشد الطلابي وأخليه ينقلني أنا ومشعل من هالفصل الخايس
دخل راكان الفصل .. والأخلاق أتشششششش !!
وقتها أكثر الطلاب جو عند راكان وقالوا له :
واحد يقوله : لا تحسبني كتبت أسم مشعل .. لأني تركت الورقه فاضيه << ازززز طعععع
والثاني يقول : راكان تعرفني زين .. ماني راعي نكبات ..
والثالث يقول : أصلا ً مي حركة رجال اللي يكتب أسم خويه ..
والرابع يقول : والله ياراكان ان حركتك حركة رجال ..
والخامس والسادس والسابع و و و و و و ...... وأنواع التطيير براكان
وراكان يقول بقلبه :
والله مافي أنصب منكم يالتسلاب
بعدين قال : خلاص ماصار شي .. وأنسوا الموضوع
ررررررررن ررررررررن ررررررررن ررررررررن
فسحه فسحه واللي نايم يصحى
طلع مشعل وراكان للساحه ..
راح مشعل للمقصف يبي يجيب 2 كاكو و2 عصير و2 مويه
وكان راكان ينتظره عند العامود اللي بجنب المرمى ..
أفطروا الشباب وبعد ماخلصوا ..
راكان قال لمشعل السالفة من طأ طأ لكيف الحال
الصمله مشعل قال :
أنا معاك ياركان لو تنقل لأي مدرسه .. وشلون لو تبي تغير الفصل << كفو يالصمله
أثناء الفسحه ..
صكّت مضاربه بين عربجي بثاني شرعي وبين مدرس اللغه العربيه ..
سبب المشكله :
هياط من الطالب .. ومسوي زحمه والفِناء فاضي ..
وبعدها المدرس حاول انه يهدي اللعب ..
وأخونا في الله العربجي يوم شاف المدرس يتطلبه علشان مايسوي ازعاج بالساحه ..
إستغل الوضع وقام ينافخ العربجي .. يعني شوفوني ياطلاب تراني قوي
ويقول للمدرس : والله اذا ماأبعدت عني أني لاأسوي وأفعل
المهم كلمه منّا وكلمه منّا وبعدها تلاقطوا
والعرابجه تفّرق .. ويجون المدرسين الصملات ويطبون مع خويهم ويجلدون العربجي
المهم بعد المضاربه ..
اسعفوا الطالب لمستشفى الملك فهد .. جناح سته غرفة اثنين للي يبي يزوره
<< ماقلتلكم ان الطالب مهايطي
انتهت الفسحه ورجعوا للفصول ..
راكان ومشعل الحصة الأخيرة عليهم رياضة
لاحد ينط بوجهي ويقول : وشلون يلعبون بالحر
هم مدارسهم فيها ملاعب وصالات مغلقه ومكيّفه .. مو مثل مدارسكم ياحظي
المهم مشعل وراكان مالعبوا بحصة الرياضة ؛؛
لأنهم راحوا للمرشد علشان يكلمونه ينقلهم من الفصل ..
وفِعلا ً كان دور الواسطه راكان فعّال
ونقلهم المرشد من أولى / خامس << فصل العرابجه وأزحف فصل بأولى
إلى أولى / أوّل << فصل الدوافير
أوّل ماطلع راكان ومشعل برا المدرسه .. تواعدوا الساعة 2 الظهر في بيت مشعل ..
راح راكان للبيت .. ونزل كتبه ..
وراح سلّم على أمه وحب راسها
<< من اللي يسوي مثل راكان ياشطّار ؟
وقالها : يمه أنا طالع عند مشعل .. تبين شي ؟؟
أمه كانت تقوله تغد وأرتاح وبعدين تروح لمشعل ..
لاكن الحين فهمت مزاج ولدها ..
وقالت له : سلملي على أم مشعل ياوليدي
طلع راكان من البيت وكافخ لبيت مشعل ..
<< ماتلاحظون ان راكان سحب على أبوه وماحب راسه
ياأغبياء نسيتوا أن أبو راكان رجل أعمال
يعني ماكان موجود بالبيت << 3 / 0
كان راكان قريب من حارة مشعل ..
ويوم قرب لبيت مشعل .. دق وسكّر .. يعني أنا واقف برا
طلع مشعل وقلّط راكان بالمجلس اللي عند المسبح ؛؛
علشان يلعبون بلايستيشن ..
لأن فيه شاشه كبر جبهت العربجي اللي راح ضحيه هياط
يعني بعد الغداء راح يصير تكسير روس بالبلايستيشن
راكان ماسك الريموت وقاعد يقلّب بقنوات ال art
طلع مشعل يشوف الغداء ..
أو مادخل المطبخ ..
شاف شوق أخته جالسه وشبه حزينه ..
سألها وش فيك شوق ؟؟
باللحظه هذي كانت شوق تفكر تقول لأخوها مشعل أو لا ..!؟
وبعد ماردد عليها السؤال .. شوق ليه وش فيك ؟
قالت بقلبها لازم أقوله علشان أرتاح ..!
قالت يا مشعل صح أنك أصغر مني ..
لاكن انت أخوي الوحيد .. وأنت عزوتي يخوي
وأنا لازم أقولك باللي يصير لي ..
يا مشعل أنا تجيني إزعاجات بالجوال ..!
وبصراحة ماني عارفه وش أسوي ..!
إذا قلت لأبوي .. أخاف يفهمني غلط ويضربني ..
وأمي مثل ماأنت عارف .. ماتعرف تتصرف بالأمور هذي ..
وأخاف لو أقولها تعلم أبوي ..
مشعل كان منصدم من كلام أخته شوق له
لاكن طلع الولد ذكي وعرف كيف يتصرف ..
قالها :
شوفي يا شوق ..
أول شي حاولي أنك ماتعلمين أحد بالسالفة هذي ؛؛
لأنها بإذن الله راح تنتهي اليوم قبل بكرة ..!
وبعدها مشعل ألّف قصص من راسه وقال انها صارت لخوات أخوياه ..
علشان يحسس شوق أن مو بس هي الوحيده اللي تجيها أزعاجات ..
وقالها الحمد لله أنتهت الإزعاجات بكل يسر وسهوله ..
لاكن أهم شي هو أن البنت ماتعطي اللي يدق عليها مجال للسوالف ..!
شوق بعد ما أسمعت كلام مشعل أخوها ..
طارت من الفرحه ولا إراديا حبّت راس أخوها ..
مشعل كان مبين الإبتسامة لشوق وكان موضح لها الثقه على أنه راح ينهي الموضوع ؛؛
علشان يمْتص الغضب والتفكير والهواجيس والخوف من أخته شوق ..
وإلا كان مشعل منقهر ومرتفع ضغطه من اللي صار لأخته ..
مشعل أخذ الشريحة من شوق وطلع برا المطبخ ..
راح للمجلس عند راكان ..
أو مادخل المجلس ..
قاله راكان :
يارجال والله لو تبي تسوي الغداء أنت بنفسك كان خلصت ..
مشعل قال لراكان :
يارجال تصدق حتى نسيت أشوف الغداء وش صار عليه
بعدين قال : أقول راكان :
لك وإلا للذيب ..؟
راكان بإستغراب ..
يخسى الذيب .. وأنت تعرف قدرك عندي يامشعل ..
بحكم الميانه والصداقة والأخوة اللي بين راكان ومشعل ..
مشعل قال لراكان السالفة اللي صارت على أخته ..
راكان بعد ماسمع السالفة ..
طق على صدره وقال :
ماني ولد أبوي إذا ماجريت لك اللي يزعج أختك ..
راكان طلّع جواله ودق على أخوه فواز اللي يشتغل بالإتصالات ..
وكان يدري أن فواز جالس على الأنترنت بالبيت ..
وأول ماكلمه قاله : هلا فواز .. فيه أحد من أخوياك مداوم الحين ..؟
قاله فواز : ليه ..؟
قال : أبي أعطيك رقم وأبيك تشوفلي بإسم من ..
قاله : اليوم يبدا دوامي الساعة 12 بالليل .. دق علي وذكرني وأنا أعلمك ..
راكان قال : خلاص أوكيه ..
بعد مانتهت المكالمة ..
راكان قال لمشعل : ياشعول خلنا نتغدى الحين .. وبعدها أكسر راسك بلايستيشن ..
وان شاء الله اليوم أجيب لك خبر المزعج الحيوان هذا ..
مشعل أرتاح بعد ماحس أن صديقه راكان واقف معاه ..
وبعدها دق مشعل على البقالة ..
وطلب اثنين سفن واثنين لبن ..
وراح للمطبخ علشان يجيب الغداء ..
المهم تغدوا الشباب وعينوا خير ..
وبعدها مشعل شبك السوني ..
وحط الوقت 30 دقيقة ..
وكالعادة .. راكان اختار الأرجنتين ..
ومشعل اختار البرازيل ..
بدأت المباراة
وفاز راكان على مشعل ..
وأنتهت المباراة << وش هالمباراة اللي بثواني
بعدها راكان جلس يرفع ضغط مشعل بالفوز
ومشعل جلس يصرف ويقول :
أصلا ً أنا كثرت من اللبن مع الغداء .. علشان كذا جاني شوية خمول باللعب
عاااااااااااش مصررررررررف
أذن العصر ..
طلع راكان ومشعل للمسجد ..
وبعد صلاة العصر مشعل قال لراكان :
وش رايك نروح نلعب كورة بفريق سلطان ..
راكان قال : ودي نروح نلعب ..
لاكن عندي مشوار مهم وضروري ..! لازم نروح نخلصه ..
مشعل قال : خلها بعد مانلعب كورة ..
قاله راكان : لا .. لازم نروح الحين ..!
وراح مشعل يغير ملابسة .. وكان راكان مشغل السيارة وينتظره عند الباب ..
ركب مشعل مع راكان وقاله :
وش عندك من أشغال الحين .. وين رايح ..؟
رد عليه راكان وقال : " نكمل بالجزء الثالث "
" الجزء الثالث والأخير "
ركب مشعل مع راكان وقاله :
وش عندك من أشغال الحين .. وين رايح ..؟
رد عليه راكان وقال : تذكر يا مشعل خويي فهد ..؟
رد مشعل وقال : فهد , فهد , فهد ! امممممممم .. أي فهد ؟
قاله راكان : نسينا ماكلينا يا مشعل .. تذكر اللي خليته يجرك بصوت بنت
قال مشعل : اييييييييه الله يقطع بليسك توني ذكرته
وراكان قاعد يتذكر الموقف ويضحك
بعدين مشعل قاله : ليش وش تبي فيه ؟
رد عليه راكان وقال : أبيه يجر الخروف على وجهه
دق راكان على جوال فهد ..
(( إن الهاتف المطلوب لا يمكن الإتصال به الآن نرجوا محاولة الإتصال في وقت لاحق ))
انقهر راكان لأن جوال فهد مقفل
وقال : أروح له للبيت ..
مشعل قال : ياراكان إذا فيها احراج عليك .. خلاص مو لازم ..
رد عليه راكان وقال : أقول لا يكثر
وصلوا حارة فهد ..
نزل راكان يدق الباب .. طلع أخو فهد الكبير ..
وقاله راكان : السلام عليكم .. فهد موجود ..؟
رد عليه وقال : دقايق أشوفه لك ..
<< عادي دايم تصير السحبات اللي مثل كذا ما أحد يرد عليك السلام
خمس دقايق ..
وطلع فهد بثوب النوم اللي مشقوق من تحت على اليمين ..
ويوم شاف راكان قال : هلاااااااااا والله بالقاطع .. وبعدها سلّم عليه
حاول انه يقلّط راكان ومشعل ..
وماسك يد راكان ويقول :
يابن الحلال اقلطوا مافي غير أنا مقابل التلفزيون بالمجلس وحتى التلفزيون طفش مني
لاكن راكان تعذر وقاله : طيب وش فيك مقفل جوالك ..؟
رد عليه فهد وقال : مشغل شريحتي الثانية حقّت الزرف
قاله راكان وهو يضحك : أجل عايش قصص حب مع هالخواريف
بعدين قال : اسمع يا فهد .. وش عندك بعد صلاة المغرب ..؟
رد فهد على طول وقاله : ماعندي شي ..
قاله راكان : حلو خلاص أمرك بعد صلاة المغرب مباشرة ؛
لأني أبيك بمهمه وقلت مالها غير الزقرتي فهد ..
رد فهد وقاله : أبشر بعزك يا ركان ..
حرّك راكان ومشعل من بيت فهد ..
وطلعوا يتمشون بشوارع الرياض لين حفظوها
وراكان قال لمشعل : على طاري التحدي .. ماودك اكسر راسك بلياردو << من اللي جاب طاري التحدي << قل مشتهي تلعب
قاله مشعل : أتحداك .. وصدقني راح أرد هزيمة البلايستيشن بالبلياردو
راحوا لبليادرو القرش اللي بشارع التخصصي
وأوّل مانزل راكان ومشعل للصالة .. راح مشعل وأخذ الطاولة اللي بالزاوية ..
وراح راكان ل " مايكل " << مدير الصالة علشان يجيب العصيان الخاصة حقت البلياردو ..
بدأ التحدي ..
وكسر بالقيم الأول مشعل .. وفاز فيه ..
وبعدها فاز بالقيم الثاني ..
وبعدها رد عليه راكان وفاز ..
وبالقيم الرابع فاز راكان ..
وبآخر قيم بينهم فاز مشعل
وأنتهى التحدي بفوز الذيب مشعل 3 / 2 ..
باقي على صلاة المغرب 15 دقيقة ..
طلع راكان ومشعل لمطعم فروج ..
واطلبوا اثنين صاروخ بدون مخلل وزياده كاتشب وشوي شطه واثنين سفن
<< طبعا ً قاطعين الببصي
وبعدها أتجهوا لبيت فهد ..
صلوا المغرب بالمسجد اللي بحارة فهد .. وبعدها أخذوا فهد معهم بالسيارة ..
وراحوا لبيت مشعل ..
قلطوا بالمجلس ..
راكان قال لمشعل قم شفلنا القهوة وأنا عمك << ميانه لأبعد من الصين << تحسبونها ميانة لأبعد الحدود 4 / 0
أوّل ماطلع مشعل من المجلس .. قال راكان لفهد :
أسمع يالذيب .. أبيك تدق على واحد الحين وتقلد عليه صوت بنت ..
وأبيك تحط السبيكر علشان أسمع صوته ..
قاله فهد وهو منحرج مع شوية ضحك : أبشر ياراكان ..
طوط طيط طيط ناط نوط ناط نوط نوط نوط طيط << فهد قاعد يدق الرقم
<< ولو تلاحظون ان رقم المزعج مميز ؛ لأن أكثر الأرقام " نوط "
بعد مادق فهد على رقم المزعج جرى بينهم هذا الحديث :
المزعج : ألو
فهد : ألوووووووو
المزعج : هلااااااااا والله من معي ..؟
فهد : أفاااااا ماعرفتني
المزعج : لا والله ياحياتي
لاكن الصوت ماهو غريب علي .. << أجل الصوت مو غريب أيالنصاب
فهد : أقوووول قلبي
المزعج : يالبيييييييه ياقلبي أنتي آمريني ..
فهد : ممكن أتلب منك تلب
(( راكان قاعد يسمع زين للمحادثة ومركز على صوت المزعج ))
المزعج : أطلبي يابعد طوايف أهلي أنتي
فهد : خلااااص حياتي أمي جت .. شوي وأكلمك
المزعج : عمري وين رايحه
خلاص تكفين تراني أنتظرك ..
فهد : يقول بقلبه " افلقني يا شيخ "
فهد قال للمزعج : أوووووكيه باااااااي
المزعج : فمان الله
فهد : ضغط الزر الأحمر
,, أنتهت المحادثة ,,
راكان داخل تفكير عميق مع نفسه .. ويقول معقول يطلع هو ..!!
لا ما أتوقع .. يمكن يشبه صوته ..
راكان قال لفهد يعطيك العافيه يالذيب وماقصرت ..
واذا دق عليك أسحب عليه ولا ترد ..
واذا أحتجت شي أنا أقولك ..
قاله فهد : أبشر يا باش مهندس راكان ..
دخل مشعل ومعاه القهوه والحلويات والحركات ..
جلسوا يتقهون ويسولفون ويتذكرون أيام المتوسطة ..
طبعا ً فهد صديق راكان من أيام المتوسطة ..
لاكن فرقت بينهم الثانوي ..
راكان راح لمدرسة أهليه .. وفهد راح لمدرسه حكومية ..
قعدوا يسولفون لين ما أذن العشاء ..
قاموا صلوا العشاء بالمسجد اللي بحارة مشعل ..
وبعدها وصّلوا فهد لبيته ..
نزل فهد من السيارة وقالهم أقلطوا ..
رد عليه راكان وقال : خلها بعدين ..
قاله فهد : أوكيه بيننا اتصال ..
حرك راكان بالسياره شوي وبعدها وقف وفتح القزاز وقال لفهد :
فهد على الاتفاق اللي بيننا .. أوكيييه
رد عليه فهد وقال : أوكييييه
بالسيارة مشعل قال لراكان : وش صار ..؟
راكان قاله : ماعليك .. اترك كل شي على أخوك راكان
بعدها راح راكان لماكدونالدز ؛ علشان يطلب آيسركيم أبو ريال له ولمشعل ..
وهم طالعين من ماك .. راكان قال لمشعل :
شوف يامشعل الحين أبي أنزلك للبيت وحاول تراجع شوي لدروسك ..
وأهم شي حاول تنام بدري علشان ماتعذب أمك الصبح ..
وأنا داااايخ شوي أبي أروح أرتاح وبعدها أنام ..
قاله مشعل وهو يضحك : أوكيه ..
الساعة 11.30 بالليل ..
راكان جالس على السرير وماخذ عقله التفكير
معقوله هو ؟
لا لا مو معقول ..
طيب يشبه صوته ..!
أنت قلتها يشبه صوته .. يعني مو أكيد انه هو ..
وجلس راكان يفكر ويسولف مع نفسه ..
جت الساعة 12.15 دقيقة ..
راكان مسك جواله ودق على فواز أخوه ..
راكان : السلام فواز ..
فواز : وعليكم السلام ..
راكان : هلا فواز .. شخبارك ..
فواز : بخير .. اخلص وش تبي
راكان : هاه أعطيك الرقم الحين ..؟
فواز : لا .. الحين أنا مشغول .. أرسله لي رسالة .. وأنا اشوي أشوفه بإسم من وأرد لك خبر ..
كتب الرقم برسالة وأرسله لأخوه ..
وجلس يفكر ويحلم أحلام اليقظه ..
* مره يتخيل نفسه بجمب رونالينو ويلعب مكان ميسي ..
* ومره يتخيل انه ورقه رابحه .. وفريقه خسران 5 / 2 وهو ينزل آخر ربع ساعة ..
ويسحب بالفريق كله ويحوسهم حووووس وبعدها يقلب النتيجة 7 / 5 لفريقه ..
* وبعدها كل الجماهير السعودية بملعب أستاد الملك فهد تصفق له
وهو يطير بالعجه ويروح يحييهم
* ومره يتخيل نفسه انه بطل فلم أكشن .. ويذبح الأشرار << يااااي
وبينما هو قاعد يتخيل هالأشياء المستحيل تصير
فجأه سمع صوت " ديد ديد ديد ديد " << نغمة الرسالة
المهم مسك الجوال وفتح على الرسالة ..
ويوم قراها .. انصدم
وقال : أنا من سمعت الصوت وقلبي حاس أنه أنت يالخسيس
(( طلع اللي يدق على شوق ويزعجها بالمكالمات والرسائل
هو طالب بفصل مشعل وراكان أيام ماكانوا بأولى خامس ))
كيف حصل على رقم شوق ..؟
كان ماسك جوال مشعل ويشوف مقاطع أهداف ومهارات ..
وشوي طلع للرسائل وقعد يقرا فيهن ..
ومن اللقافة راح للأسماء وقام يتفرج ..
ومشعل الله يهداه مخزن أخته شوق بأسمها ..!!
المهم هالملقوف لفت انتباهه أسم شوق ..
ومن خلال نظرة سريعة للرقم أحفظه هالخايس
وهو مايدري أن شوق أخت مشعل ؛؛ لاكن يحسبها رقم بنت ومخزن بجوال زميله ..
المهم من ذاك اليوم وهو يدق ويرسل على شوق .. ويحاول أنها تعطيه وجه ..
لاكن هيهات لك يالأجقم .. مو أنت اللي تلعب على شوق ..
راكان كان يفكر وش يسوي بكرة بالمدرسة ..
وكان يقول : وشلون أحل المشكلة بالطريقة المناسبة ..
بعدين قال : جبتها
أتخذ راكان الإجراء المناسب وحل المشكلة بدون أي مشاكل
ومشعل جاب شريحة جديدة لأخته شوق ..
مشت الأيام بسعاده للجميع
..
..
..
** بعد سنتين **
طلع مشعل من صلاة العصر ..
ودق على راكان وقاله : البس وخلّك جاهز .. الحين أمرك نطلع للملعب ..
والساعة 4.30 العصر , طلع مشعل لراكان .. ولقاه يطقطق بالكورة مع عيال الحاره ..
ركب مع صديقه وراحوا لفريق خويهم سلطان .. << للحين عايش هالفريق
لعبوا وكان راكان لاعب مهاري وخطير
ومشعل عليه رجل .. الله لا يوريكم تقول روبرتو كارلس ماغطها بووووز
أذن المغرب ..
أنتهى التمرين .. وراح مشعل ونزل راكان عند باب بيتهم وقاله :
أسمع يا راكان .. صل المغرب وخذ شور سريع .. علشان أبي أمرك نطلع مشوار ..
راكان قاله : أوكيه ..
بعد صلا المغرب بنص ساعة ..
دق مشعل على راكان ..
طووووووووووووووط
طووووووووووووووط
طووووووووووووووط .. ومشعل يقول وش عند الدرج مايرد ؟
طووووووووووووووط
طووووو طووووو طييييييييي << يعني لم يتم الرد
المهم بعدها دق مشعل تقريبا ً 10 مرات .. ولم يتم الرد ..!!
مشعل حس أن فيه شي .. قال أروح لبيت راكان وأسئل عنه ..
طلع لبيت راكان .. ودق الباب .. اللي فتح الباب فواز أخو راكان ..
فواز : هلا مشعل ..
مشعل : هلا والله فواز ..
فواز : اقلط ..
مشعل : الله يسلمك مستعجل ..
مشعل : فواز بالله صوت لراكان ..؟
فواز :راكان طلع مع خويه بسام
مشعل : طلع مع بسام ..!؟؟ طيب متى طلع ؟
فواز : بعد صلاة المغرب بشوي .. طيب دق عليه ..
(( مشعل مايبي يبين لفواز عن الصدمه اللي حس فيها .. علشان كذا قال : ))
خلاص يعطيك العافيه يا فواز .. أنا راح أدق عليه .. وإذا جاء بالله بلغه أني مريته ..
قاله فواز : إن شاء الله ..
مشى مشعل من عند بيت راكان وهو مغبووووووووون ..!
(( أبي أقول لكم منهو بسام ..
بسام هذا كان صديق مشعل وراكان .. وصارت مشكلة بينهم ..
لأن بسام يدخن وراعي حبوب وقت الإختبارات وراعي مشاكل بإختصار " عربجي "
وقرر راكان ومشعل أنهم يتركون بسام ومايرجعون له أبد .. والمشكلة اللي جاب الفكرة هذي هو : راكان ..
علشان كذا انصدم مشعل بالخبر اللي سمعه من فواز أخوه يوم قال أن راكان طالع مع بسام ..! ))
المهم مشعل رجع للبيت .. وهو بالطريق جته أفكار وقام يلعب بعقله الشيطان ويقول :
* يارجال هذي آخرتها يامشعل عشرة عمر بينك وبين راكان وبكل سهولة راكان يترك ويسحب على الموعد اللي كنتوا متواعدين فيه علشان الداشر " بسام " ..!
* بعدين هذا أنت دقيت عليه أكثر من 10 مرات وليه مارد عليك ..؟
أكيد تلقاه مع بسام وماله خلقك ومايبي يحرج نفسه ويرد عليك قدام خويه الجديد ..!
* صدقني يا مشعل لو تدق على راكان أو تروح له للبيت ثاني مره .. فأنت " ماعندك كرامه " ..!!
* مشعل أنت أبوك دكتور .. ومايحتاج تذل نفسك وتهين كرامتك ..!
المهم تمكن الشيطان وأقنع مشعل ..!
وأول مادخل البيت مشعل راح لغرفته وقفل الباب وحذف نفسه على السرير وقام يبكي
يبكي من القهر ومن الغبنه ومن الموقف اللي ماكان يتوقعه بيوم من الأيام ..
ومن منهو ؟؟ من أعز انسان بحياته وأفضل صديق عنده " راكان " ..
بعدها مشعل ماقدر يمسك أعصابه ..
مسك الجوال ودق على راكان .. يبي يسمع صوته ويطلع اللي بقلبه لصديقه ..
ويتصل مشعل ويستمر بالاتصال .. لاكن مع الأسف " لم يتم الرد "
ويجي الشيطان لمشعل .. ويستغل الوضع اللي فيه مشعل ..
وبعدها يقعد يوسوس له ويشوّه صورة راكان ..!!
مشعل مسك الجوال وفتح على الرسائل وبعدها فتح إنشاء رسالة جديدة وكتب :
" ياراكان .. صدقني اني انصدمت فيك اليوم ..
والله ماكنت متوقع بيوم من الأيام أني انصدم فيك .. لاكن للأسف هانت عليك العِشْرة اللي بيننا ..
راكان صدقني قاعد أكتب الرسالة الحين وأنا قاعد أبكي وفيني قهررر وغبنه وضااايق صدري كله منك يالخاين راكان أنا خانقتني العبره وما أدري كيف أطلع لك اللي بقلبي لاكن أبي منك شي واحد ياراكان .. أبيك تمسح رقمي من جوالك وتنسى أن كان لك صديق أسمه مشعل ..
شوف ياركان أنا بعد الرسالة هذي راح أقفل جوالي ..
صدقني ياركان لو تجيني بالمدرسة أو تقرب من عندي صدقني راح أترك المدرسة كلها ..
راكان خلاص أنا كرهتك .. وصدقني لو ماحنا بآخر السنة .. كان نقلت من المدرسة والسبة " أنت ياخاين " ..
أرجوا أنك تسامحني إذا أخطيت عليك بشي بالأيام اللي كنا فيها أصدقاء ..
وأتمنى أنك ماتذكرني لا بخير ولا بشر ..
وياليت ماتمرني للبيت ولا تدق علي .. لأني ماراح أرد عليك ..
خلص مشعل من كتابة الرسالة ..
وبعدا أرسها لراكان .. وكانت آخر رسالة من مشعل لراكان ..
رجع راكان للبيت الساعة 9.00 بالليل تقريبا ً ..
وكان يفكر ويقول : الحين يصرعني مشعل بعد السحبه الحلوه
مسكين راكان بلاه مايدري وش صار بمشعل ..!!
أول مادخل راكان للبيت راح على طول لغرفته .. وأخذ الجوال من الشاحن ..
وتفاجئ يوم شاف :
مكالمات لم يرد عليها = 47
الرسائل الوارده = 1
فتح المكالمات وشافهن كلهن بأسم " مشعل " ..وبعدها فتح الرسالة ..
وقعد يناظر فيها ..
وبعدها قراها مرة ثانيه .. قال يمكن أنا ماكنت مستوعب الرسالة زين ..
وبعد مادقق بالرسالة وتمعن فيها أكثر من نص ساعة
انصدم وتحسف وندم وانقهر لأنه ما أخذ الجوال معاه ؛؛
لأنه كان يفكر أن بسام كان يبيه يسلم عليه عند الباب ويمشي ..
أكيد تسئلون وشلون راكان طلع مع بسام ..؟
جاء فواز لراكان وقاله : يبيك خويك المطّوع عند الباب ..
رد راكان وقال : خويي المطّوع .. منهو ؟ وش اسمه ؟
قاله فواز : يقول اسمه بسام ..
قال راكان : سبحان مغير الأحوال .. بسام تطوع ؟؟
المهم طلع راكان وسلم على بسام ..
ومن زود ماكان مستانس ان بسام تطوع حبه على راسه
وبعدها بسام قال لراكان : أمش اركب معاي أبيك ..
راكان من فرحته ببسام لأنه تطوع .. نسى الجوال على الشاحن بغرفته ..
وقال أكيد شوي وينزلني للبيت ..
وبعدها قاموا يسولفون وبسام قام يشرح لراكان كيف ألتزم وكان يحمد ربه ..
وهم يسولفون أذن العشاء .. وكانوا قريبين من طريق الدائري .. بعدها بسام قال لراكان نبي نصلي بجامع الراجحي .. وراكان كان منحرج لأنه من زمااان ماقابل بسام والشي الثاني لأن بسام تطوع وعلشان كذا قاله : أوكيه ..
وراكان قال بنفسه :
اذا جيت للبيت أقول لمشعل السالفة وأبشره أن بسام تطّوع .. وبعدها نطلع نخلص شغل مشعل ..
المهم راكان على طول دق على جوال مشعل ..
ولاكن مع الأسف " إن الهاتف المطلوب لا يمكن الإتصال به الآن ................. "
وجلس راكان يفكر ويدور حل للمشكلة اللي مايدري من وين جته
راكان كان منغبن ومنقهر زيادة ؛؛
لأن مشعل مايدري وش السالفة بالضبط .. ويحسب راكان ساحب عليه ..!
وبعد محاولات من راكان لمدة أسبوع ..
بعدها بحكم الميانة الكبيرة بين راكان ومشعل ..
راح راكان وكلم أبو مشعل وفهمه السالفة ..
وكان أبو مشعل يقّدر راكان ويعتبره مثل ولده مشعل ..
المهم أبو مشعل قدر يقنع مشعل ويخليه يواجه راكان ..
وبعدها تواجه راكان ومشعل بمجلس مشعل ..
وراكان فهّم مشعل السالفة كلها ..
وبعدها رجعت المياه لمجاريها
وكملوا صداقتهم مع بعض .. ورجع لهم بسام .. وكان عون لهم على الطاعه ..
وبعدها تخرجوا من الثانوي :
مشعل / دخل كلية الطب بجامعة الملك سعود ..
وراكان / دخل كلية الملك فيصل الجوية ..
شوق / تخرجت من الجامعة وصارت معيده فيها ..
وتزوجت
وبسام / دخل دراسات قرآنية بجامعة الإمام ..
وفهد خوي راكان / ترك التسحيب بالعالم وتوظف بشركة أخو راكان ..
وسلطان / للحين مسوي فريق ويلعب كورة
..
..
..
..
" مايستفاد من القصه "
" الخلاصة "
" الزبده "
1 / حاول أنك تحل الواجبات بالبيت .. وإذا كنت مصمل تحلهن بالمدرسة خلاص حل الواجب بالفصل أول مايعطيك أياه المدرس ..
2 / حاول تنام بدري .. مو علشان المدرسة ؛؛ علشان ماتغث أمك لأنها تتعب وتبذل جهد كبير علشان تقومك الصبح .. وبعدين حط في بالك تقوم على صلاة الفجر .. مو توقت الجوال على الطابور .. أو الدوام للموظفين ..
3 / خلك صمله وفدائي بالمواقف الحرجه اللي مافيها ضرر بالدين مثل راكان ..
4 / مافي أزين من الإحترام .. يعني حاول أنك ماتسوي زحمه وتهايط على غيرك .. علشان ماتلحق خوينا اللي بثاني شرعي ..
5 / حاول تعود نفسك كل ماتجي من الدوام ( مدرسة - جامعة - وظيفة )
أول شي تسويه أنك تحب راس أمك وأبوك .. لا تقولي تستحي
أنا أدري ان فيه ناس ينحرجون من أبّهاتهم
من جد الحين ليه الواحد يمون على أمه ويطلب منها فلوس
وبالعكس مع أبوه
لاكن أقل شي حاول تبوس راسك أمك .. وصدقني فيها أجر عظيييييييييم ..
ومنها يتعودون أخوانك الصغار إذا شافوك .. وتكون خلقت فيهم عادة حسنه تحسب لك ..
6 / حاول تكون قريب لأهلك في كل شي ..
وياليت أنك تجيد التعامل مع خواتك .. وتخلي العلاقة بينكم قويه .. علشان أنت عزوتهن ..
7 / حاول أنك ماتخزن أسامي أهلك بنفس أساميهم ؛؛ لأن يمكن يطيح الجوال بيد مراهق
أو بيد واحد ما يستحي وبعدها أول مايشوف أسم بنت " فلانه " دايركت يحفظ الرقم وأحتمال يكشخ فيه ويوزعه ..!!
8 / ياليت مانحكم على أخويانا من موقف واحد ؛؛ وياليت مانسرع بتفيذ الحكم فيهم ,, وننسى عشرة العمر اللي بيننا ..!
الحين أنا متأكد لو صارت الحركة اللي حصلت لمشعل بأي واحد فيكم ..
أكيد راح ينغبن وينقهر وينصدم ويمكن يتخذ نفس إجراء مشعل إذا سيطر عليه الشيطان ..!
لاكن أنا أقولكم : دائما ً وأبدا ًإذا تبي تكون مرتاح بكل شي .. لازم أنك تظن خير بأخوياك !!
أحس أنكم مافهمتوا وش أقصد .. طيب هذا كم مثال للتوضيح :
أ ) دقيت على خويك ومارد عليك .. ودقيت بعد ربع ساعة وحصلته إنتظار ..
لا تظن فيه ظن يسيئ لخويك ويخليك مع الأيام تكره خويك ..! حاول تخلق له الأعذار .. يعني تقول :
أكيد كان جواله على الصامت .. وأوّل ما أخذ الجوال جته مكالمه ..
أو كان مشغول مع أهله .. ويوم جاء يبي يدق علي .. دق عليه واحد ..
ب ) دقيت على خويك ومارد عليك .. ودقيت بعد نص ساعة وحصلته مشغول ..!
قل : يمكن فيه غيري يدق عليه بنفس الوقت ؛ علشان كذا طلع عندي مشغول ..
ج ) كنت مواعد خويك بعد صلاة العشاء ..
وبعد ماطلعت من صلاة العشاء دقيت عليه وحصلت جواله مقفل ..!
قل : يمكن جواله طافي بطاريه ..
د ) دق عليك خويك.. وقمتوا تسولفون وفجأه سكر بوجهك الخط ..!
هذي خذها مني أكيد رصيده خلّص ..
والأعذار كثيره لاكن تبي اللي يقنع نفسه فيها ..
وصدقوني إذا ظنيتوا ظن حسن بأخوياكم راح ترتاحون وماتفكرن وتوسوسون ..
والشي اللي منت متأكد منه 100% لا تظن فيه ظن سوء ..
بالعكس حاول أنك تعتذر لخويك عند نفسك ..
الظاهر طولت عليكم ...
>>>>>صدز عاد خخخخخخخخخخخخ
بس والله انه حلوة خخخخخخخخخخ
www.alhnuf.com
منتدى البرامج المشروحة
المواضيع المتشابهه
