عشق الصداقه (الجزء الاول)

الهنوف2007 · 09-11-2007, 06:38 م

الصداقه من اقوى العلاقات الانسانيه. علاقه يميزها انها تجمع عدة مشاعر واحاسيس في اطارها مثل المحبه. التضحيه وغيرها. يمكن اغلبنا او اقدر اقول يمكن كلنا حصلت له مواقف مع اصدقاءه منها الحلو ومنها المر منها اللي تقوى العلاقه ومنها اللي تنهيها. قصتي تتكلم عن هالموضوع. تقدرون تقولون انها تحمل مشاعر اكثر منها احداث لكني قررت بعد تفكير طويل اني اعرضها للناس عشان يستيفيدون منها. احنا كمجتمع للرجال حدود الصداقه غالبا معروفه عندنا واغلبها تكون وناسه والمصلحه. وانا مااقول الكل بس اكثرها لكن اللي صار معي شيء ثاني وهاذي قصتي...................في عام 1408كنا تونا منتقلين لمدينة الرياض والدراسه بدت من اسبوعين تقؤيبا كنت في سنه رابعه ابتدائي دخلت فصلي الجديد وسوا الاستاذ تعارف بسيط بيني وبين الطلاب لما جاء وقت الراحه طلع الجميع الا انا" دخل ولد اسمراني شعره حوسه واسنانه الاربعه الاماميه طايحه ومشمر اكمامه ووجهه كله مخوش وحالته لله الا انه رغم كل هالبلاوي فيه شيء يخليها مو باينه..!! قعد يحوس في شنطته ساعه وكل دقيقه يطلع خرابيط وكل شوي يرفع عينه عندي واخيرا طلع منها نبيطه. وقبل لا يطلع التفت علي وكان من النوع اللي كنه بينطحك وهو يطالع. منزل راسه شوي ومعبس طول الوقت بس كانت بريئه اكثر من ان تكون مرعبه.1!!وقال بلدغه طفوليه سببها واضح وهو اسنانه اللي حالتها صعبه: انت الحين ليش جالس لحالك؟ كانت هاذي اول جمله سمعتها من الانسان اللي صار بعد كذا اغلى البشر على قلبي؛ كان معروف عني اني انطوائي ومنعزل هادي بطبيعتي حتى اني اتوتر لمايكلمني احد مااعرفه رديت عليه: بس كذا انا ماابي اطلع وبعدين انا مااعرف احد هنا... اعلم انها كانت عاده عنده.تعال معي وانا اعرفك على نص اللي بالمدرسه. كان يجرني من يدي وانا اسحبها بخوف. لا لا لاانا كذا مرتاح قلت لك ماابي اطلع.. لكن الولد اصر لين طلعني معه بالغصب. وزي ماقال عرفني على نص المدرسه تقريبا لكن تبون الصدق حسيت اني تعلقت فيه هو!!! يمكن عشان شخصيته عكسي تماما اجتماعي خفيف دم والكل يحبه ويحاول يتقرب منه صحيح انه كان شيطاني ومشاغب لكنه ماكان يتعدى على احد!1! حسيت اني مبهور بشخصيته رغم انه ذكي جدا الا انه فالدراسه ماكان بالحيل بس كان يعرف يمشي عمره من يومه صغير. وعلى كثر الاولاد اللي يعرفهم الا انه بعد تعلق فيني فوق ماتتصورون صرنا ما نتفارق ابد ولا يشوفون واحد فينا بدون الثاني. مرت السنوات وصداقتي تزدلد قوتها مع خالد.. مرت علينا سنين الطفوله والمراهقه وحنا سوى ودخلنا الجامعه وتخرجنا وحنا ماعمرنا تفارقنا. حتى في السفر مااذكر ان واحد سافر بدون الثاني الا اذا كانت السفره مع الاهل. واغلب الناس اللي يعرفونا يحاولون ياخذونا قدوه وكثير منهم يضربون المثل في صداقتنا. يمكن تتساءلون وش سر هالصداقه العميقه؟ شيء واحد كنا نطبقه بدون مانحس من يوم حنا صغار. شيء عجزت اغلب الناس انها تفهمه في تعاملها مع بعض. وهو ان كل واحد فينا كان متقبل الثاني بكل مافيه من العيوب ولا عمر واحد فينا حاول يغير الثاني ويمشيه على طريقته برغم الاختلاف الكبير اللي بينا.. خالد كان فيلسوف بالفطره وبسبب علاقاته الكثيره. وكنت اتعلم منه الكثير لما اساله كيف يقدر يجمع كل هالناس حوله كان يقول كلمات بسيطه لكن تركت فيني اثر كبير كان يقول: اسمع يابندر الناس لها مشاكلها وكل واحد بالدنيا صدقني منشغل في نفسه ولا احد تهمه مشاكلك فاذا تبي الناس يحبونك انسى نفسك وفكر فيهم وكيف تساعدهم في حياتهم بقد ماتقدر. قصتي الاساسيه اللي ابيها توصلكم مو في كيفيه صداقتنا لاني مهما شرحت ماراح اوصلكم مدى عمقها لكن الحدث اللي قلب حياتي ولا اظن ترجع زي ماكانت. في يوم الاربعاء جاني خالد للاستراحه اللي نجتمع فيها مع الشباب والفرحه مبينه في عيونه وسحبني من بينهم.... تعال بندر ابيك في كلمة راس.لما صرنا برى.... عندي لك مفاجئه.وابتسم انا ذاك الوقت اللي يشوف وجهي يقول خبل اناظر فيه وفاتح فمي..كمل كلامه...ابشرك الوالده خطبت لي!!! في هاللحظه حسيت كاءن احد عطاني كف على وجهي.. اييييييييييييييييييييييييييييييش؟؟؟؟؟!!!!!!! ..طالعني بنفس طريقته يومه صغير واللي ماتغيرت ابدا.... وراك تقولها كذا كنك مو مبسوط...وباءرتباك رديت..لا مبسوط بس انت فاجئتني وصدمتني صراحه!! ماعمرك جبت طاري الزواج! ...... ضحك وهو يغمز ... عارف بس الوالده اقترحت علي الموضوع وقلت لها مافي مانع. توقعت ان السالفه كلام او علاقل بتاخذ وقت بس ماشاء الله عليها يومين الا هي جايتني تقول ترى لقينالك الظاهر انها حاطتها في بالها من زمان وبعدين ماعاد الا خير والا شرايك؟!!! يعني للحين ماشفت البنت ياخويلد.. افا عليك بس يابندر!!! الحين اقولك توي داري وجيتك بسرعه. الوالده تقول انهم حددوا يوم الاثنين عشان اجيهم اشوفها. تفاجئت..الله بسرعه؟؟؟.. مو اقولك شكل السالفه مطبوخه من قبل .......على كلا الله يوفقك انشالله ...عقبالك- يالرمت_ (خالد لما كان صغير كان يحاول يناديني بكلمه الروميت الانجليزيه لكنه كان يقولها بها الطريقه ومشت معنا كذا صارت زي اللقب بيني وبينه). اغتصبت ابتسامه.لاوين توالناس علي المهم الحين خلنا نرجع للشباب لا يبدى التعليق .. وبتعجب ممزوج بغضب مصطنع رد خالد. لحظه لحظه بندروه الحين اقولك خطبت وزحمه ولا تعزمني على شيء بها المناسبه ؟؟؟!! على الاقل ودني لكوفي شوب يااخي!! ضحكت.لا ياعمي الحين قهوه وبعد شوي الا احنا في واحد من هلمطاعم حقتك اللي فواتيرها تكسر الظهر تراي اعرفك زين خلاص عشرة عمر...رد..والله انكقعيطي مستخسر فيني؟؟. وقعدنا نضحك. حطيت يدي على كتفه.. ولا يهمك ياخالد اذا صار شيء اكيد ابشر بذيك العشوه اللي يحبها قلبك فالمطعم اللي تختاره وش تبي بعد؟؟.. كان ودي اعزمه بس النفسيه عدم ..رد بغمزه..ماتقصر اصيل يابندر بس اهم شيء لاتفشلنا مثل ذاك اليوم!!... افشلك متى ياويلك من الله؟؟... عطاني نظره اللي مو مصدق... معقوله نسيت ذاك اليوم يوم يمدح خوينا سامي ذاك المطعم. قلنا لازم نجربه ونشوف.. لما تذكرت الموقف بديت اضحك.اوووووووه الله يقلع شرك وش ذكرك بهالموقف الحين. ابتسم خالد ويده على وجهه.تذكر؟؟يومها طلبنا عصير وطقيت الصدر يعني انت اللي بتدفع ويوم جاالحساب جت معه المصيبه. والله لو انك شايف وجهك يابندر يوم شفت الفاتوره تقول صابين عليك مويه بارده. انحرجت.. لا والله !! على الاقل احسن من اللي قعد يتفلسف ويسوي روحه ابو العريف. لاوتاشر بيدك بعد كننا في ملعب وبديت اقلد صوته ونظرته المعروفه.لو سمحت الفاتوره مو لنا حنا طلبنا عصير بس!1! والله لوك شايف وجهك انت يوم رد عليك. نعم ياسيد هاذي فاتورة العصير بس . الحين من اللي طلع فشل الثاني ؟. ابتسمت.. اذكر مابقى في جيوبنا شيء ماطلعناه ويلله كفى ولقطنا وجيهنا وطلعنا وحنا نتصدد لا احد يشوفنا.. وطوال ماكنت اعيد القصه وخالد ميت من الضحك. كان يسعدنا ان حنا نعيد الذكريات اللي اللي مثل هاذي المهم رجعنا عند الشباب . من بدا موضوع الخطبه حسيت انه خلاص ماراح يرجع شيء زي اول. تضايقت مره بس ما ادري وش اللي فكرت فيه يعني مستحيل نقعد كذا واقع لازم زواج للابد كان واقع لازم نرضى فيه. لما رجعنا داخل كان مستانس يلعب يضحك وينكت صحيح هاذي عادته لكن اليوم كان بزياده اما انا كنت عكسه تماما حسيت اني باافقد هالانسان.. الشخص الوحيد اللي اعتبرته صديقي... (2) يوم الاثنين العصر جاني البيت!1 خفت يكون صاير شيء.. خير خالد عسى ما شر.. وبتوتر واضح في صوته.. ابد والله احس اني متوتر شوي... ابتسمت له... ياابن الحلال شده وتزول زي غيرها... ابتسم وقال.. وشرايك تجي معي!1 قعدت اطالعه ابي اتاكد انه جاد.... انت صاحي!1 وين اجي معك؟. طيب تعال وخلك فالسياره بس.... شديت على يده وحطيت عيني بعينه وقلت له : ياابن الحلال رح لحالك وانا بستناك في بيتنا طيب!1 كاءن يطقطق اصابعه... ادع لي يالرمت. مايحتاج قول الله يوفقك ويسنع دربك انشالله . يالله عاد الحين رح وحلق وتكشخ تلقاك شهر ما دخلت الحلاق على هالوجه. كنت احاول اضحكه لانه واضح انه متوتر.. طيب اجي عندك عشان تشوف كشختي قبل اروح لهم. كتمت ضحكتي.انا لله وانا اليه راجعون؟ انتوبعدين معك ياعمي اصلا البنت اول ماتشوف عيونك بتوافق لاتشيل هم وتوكل على الله .. الله يستر ما ادري وش فيني خايف ياعمي؟ ....(كلمه ياعمي معروف اني دايم اقولها فاذا قالها خويلد لي يعني خلك معي او افزع لي زي ماتقولون كانت كلمات بينا)...... عادي كل العالم يتوترون في هالموقف بس انت شد حيلك ولاتتاخر على الجماعه.... طلع من عندي وبعد العشاء كنت انا اللي ماادري وش اسوي بعمري من التوتر وكل شوي ادق عليه لدرجة ان ريم اختي حاولت تهديني.. ماصارت يابندر يمكن انت متوتر اكثر منه....ياريم هذا خالد تعرفين يعني وشو خالد هذا اقرب لي من نفسي..... والله عارفه بتعلمني فيكم بس اذكر الله وهد حالك شوي...... مابقى عندي صبر وطلعت للشارع استناه بعد حوالي الساعه شفت سياره مقبله علي بسرعه جنونيه كالعاده لدرجة انه بغى يدخلني تحتها لولا اني بعدت بسرعه. نزل بسرعه وشوي ويناقز من الفرحه.. وبرعب صرخت فيه. خويلد!! انت خبل بغيت اروح تحت سيارتك. ناظرني نظرات جديده علي وابتسم..... سالته. ها بشر؟؟ . لمني الرجال وعرفت انها دخلت مزاجه لدرجة انه ماعاد يدري وينه فيه المشكله انه يتكلم ولا فهمت من اللي قال ولا حرف. كنت اعرفه عاطفي بس ما توقعت انه يتعلق لها لدرجه وبها السرعه فرحت له لما شفت كل هالسعاده فيه لكني بديت اتخيل وشلون بيصير حالنا بعد هالتغير اللي ما طرى على بال يمكن تستغربون ليش كنت متخوف كثير بس صدقوني لما يكون عندك انسان موجه لك كل ذره في كيانه وكل فكره معك ولفتره طويله من عمرك وفجاءه يجي من يشاركك فيه صدقوني تتلخبط حياتك ولو كانت المشاركه بسيطه وشلون لو جا الانسان اللي بيصير منافس لك؟... مو حب تملك لكنها عاده وغلا كبير. قطع حبل افكاري خالد وهو يقول: على فكره بندر في شيء ابي اقول لك ...وجهه وهو يقول هالكلام ذكرني بوجهه لما جا يعلمني انه سرق شاهي وحليب من غرفة المدير واحنا صغار. قلت باابتسامه وش مسوي بعد هالمره؟. مسكني بيدي وجلسنا على الرصيف بيتنا حسيت الموضوع جد قال: صراحه يابندر انا ماقلت لهم اني ادخن؟!....... لحظه قبل لا تقول شيء اصلا هم ما سالوا الا اليوم وانحرجت وقلت لهم لا ماادخن خبرك خفت يرفضون.. افا ليش ياخالد تبدى حياتك بكذبه تافهه؟!.. ومن قال لك انها كذبه؟ اصلا انا نويت اني اوقف زقاير... انا لما قال لي كذا ضحكت...تذكرت السنين اللي كنت احاول فيه انه يوقف وكيف انه حاول كم يوم ولا قدر وفالاخير لما اشوفه يعاني نستسلم. لكن من عيونه واضح انه كان مصر ومصمم هالمره على هالشيء والله العالم. بندر اكيد بيجون يوم ويسالونك انت من بد الشباب عشان كذا حبيت اعطيك خبر. مو شرط ياخالد بالعكس كثير ناس مايفضلون يسالون الاصدقاء المقربين وطبعا واضح السبب لكن لو جاني احد وسالني عنك ماراح اكذب عليه بقوله هالكلمتين يالرمت: خالد صديقي والنعم فيه بس انا متفق معه لما نتزوج محد يعطي معلومات عن الثاني عشان الاحراج لان زي مالواحد يقول الحسنات لازم يقول السيئات مافي كامل فهالدنيا هذا زواج مو لعبه وحنا مانبي نضطر لها لشيء بس اذا تبي العلم بااختصار لو طلبني اختي عطيته اياها وهذا كل اللي عندي ....... لما انتهيت من كلامي ربت على كتفي وقال ريحت بالي ماخاب ظني فيك يالرمت انا اشهد اني عرفت من اخاوي توادعنا وركب سيارته دخلت البيت وانا احس بضيقه شديده صحيح دخلنا ال26سنه ذاك الوقت يعني طبيعي اللي يصير لكن ماادري وش اللي كان صاير معي. كان يكلمني كل يوم عن المستجدات اللي صارت ويسالني اذا كان احد جاني من اهل البنت وانا اقول له للحين ماشفت احد وحتى لما نتقابل طول الوقت يتكلم فهالموضوع بيني وبينكم بديت اطفش صار كل كلامه عن زواجه لكن اللي معجبني في هالسالفه كلها اصراره على ترك الدخان صحيح حالته كاسره خاطري يعني صداع ماتركه ابد وعيونه دايم حمر ونفسه في خشمه طول الوقت والربع كلهم يحطمونه يقولون اول ماتتزوج بترجع لاتتعب نفسك. بس في تقدم قعد اسبوع وشوي بدون ولا زقاره. كان مصر على هالبنت وما يبي شيء يوقف في طريقه وخالد صديقي واعرفه زين اذا حط شيء في باله يجيبه.... (3) يوم الخميس زي عادتنا كنا مجتمعين انا والربع فالاستراحه وخالد للحين ما جا صار دايم يتاخر لكن عمره ماتركنا كنا جالسين بعضنا يلعب ورقه والباقي يسولفون انا كنت العب وسمعنا صفقة الباب اللي برى وبما خالد اللي ناقصنا عرفنا انه هو. وبدى التعليق اللي يقول جانا العريس والثاني يقول الله يعينا عليه من اول ما وقف زقاير وهو نار شابه قلت لهم: كلش الا خويي عاد لحد يغلط عليه وانا موجود. وقعدنا نضحك فتح باب الغرفه والتفت اسلم عليه ماحسيت الا واحد يرفعني من القلابي ويلزقني عالجدار بقوه لما حاولت اعرف من هو الا هو خالد كان معصب ويصرخ في وجهي ويدفع جسمي عالجدار بطريقه عنيفه كنت مصدوم واطالع فيه مو فاهم شاللي صاير حتى ربعنا يطالعون بتعجب ولما استوعبت ان السالفه هوشه قاموا يفكونه عني. في هاللحظه انا للحين مابعد استوعبت الموقف بس يوم شفتهم يسحبونه عني حسيت انهم اوجعوه بديت ابعدهم معه واحاول احميه بيديني كنت خايف عليه وجسمه صار احمر من تسحيبهم الشديد وانا لها للحظه ماادري وش صاير لكنهم كانوا اكثر منا وقدروا يمسكون كل واحد في وجهه سامي كان يسال خالد بعصبيه؟؟.... انت صاحي؟... وش جاك ياخالد انهبلت؟ وش صاير؟ ورد خالد بصوت انسان ثاني ماعرفه وياليته ماتكلم: اسال هالجبان اللي قدامكم وش سوى لاتسالوني انا... هالوقت بديت استوعب الموقف... خالد قدامي في حاله عمري ماشفته فيها.. معصب والكلام يطلع مقطع منه بسبب تنفسه السريع. نظراته ماغيرها تطل من عيونه بس الحقد حل محل البراءه؟ كان كل شوي يحاول يتخلص من يدينهم عشان يضربني!! تصوروا!! بعد كل هالعمر وهالعشره يضربني انا بندر صديق عمره ورفيق دربه قلت له وانا احاول اقرب عنده اهدا وش بلاك ياخالد انا وش سويت ياخوي؟! رجع يحاول يتهجم علي وابعدوني عنه بسرعه..لا تقول ياخوي انا لاني اخوك ولا اتشرف اكون اخوك وبصوت تخالطه البحه من شدة الصراخ وهو يمسك راسه بين يدينه بعصبيه..وبعدين لاتقول وش سويت ياحقير لا تنرفزني زياده... خفت عليه كان يصارخ مايتكلم ويطلع كلامات زي السم....لما ماتكون قد الكلام اللي تقوله لا تقعد تتفلسف علي يااكبر كذاب..قالسامي خالد وش هالكلام؟؟ كبر عقلك وخلنا نفهم القصه؟ صرخ فيه.. انتم لاتدخلون ورجع يطالعني وهو يضرب على صدره بقهر واضح.. انت ماشفتني اموت فاليوم عشرين مره وانا احاول بكل مافيني اني اوقف زقاير ليش تقولهم اني كنت ادخن ليش؟ كنت هاللحظه زي الغبي وعيوني بتطلع من مكانها رديت... خالد انا قلت لك محد جلني ولا احد سالني--..كلامي زاد ثورته وقام يتحرك زي المجنون.. هذا اللي يبي يذبحني بندر لا تكذب ماابي اسمع منك ولا كلمه صحيح انهم ارفضوني بس مايهم البنت بدالها الف وبدت نبرة صوته تخف حدتها.. لكن يابندر ليش ؟ الكلام اللي قلت لي ذاك اليوم كان كله كذب وتمثيا؟؟ على الاقل ليش توعدني وتخلف لو قلت انك بتعلمهم كان تفهمت الموضوع. انت حطيتني في اصعب موقف.معقوله استخسرت السعاده اللي انا كنت عايشها ولا قدرت تستحمل فكرة اني ابعد عنك شوي!! معقوله يابندر انت من بد هالعالم كلهم تسوي فيني كذا هذا جزاي اني عزيتك؟؟ ورجعت النبره عاليه.. ماتوقعتك كذا ابدا انت انسان اناني تعرف يعني ايش اناني؟ حاولت اتمالك نفسي ورديت بصوت هادي قد مااقدر...بس لاتكمل لا تقول كلام تندم عليه بعدين ياخالد لاتظلمني وانا اخوك.. ضحك بسخريه..اندم!! اندم على ايش ولا ايش؟! على العشره الحلوه اللي كانت بيننا والا على 16سنه اللي ضيعتها من حياتي على واحد مثلك والا عالانسان اللي توقعته صديقي وما طلع-----وقبل مايكمل كلمته هالمره انا اللي تخلصت من يدينهم وهجمت عليه ورميته عالارض ولما ثبته تحتي رفعت يدي لكنها وقفت وكل عضله فيني ترجف رجفه فظيعه. لان اللي تحتي خالد خالد الرفيق!! خالد الغالي! يارب انا وش سوي قاعد اسوي معقوله امد يدي عليه؟ صرخت في وجهه..اسمع يا خالد كل الكلام اللي قلته ممكن اتغاضى عنه عشان المعزه اللي لك بقلبي ولاني متاكد انه فيه سوء فهم فالموضوع اما انها توصل فيك انك تقول اللي بيننا ماكان شيء فهذا اللي ماراح اسمح لك تقوله فاااااااهم؟! خلص يدينه من يديني ودفعني من فوقه....اقول ابعد عني بس...وقف وانا للحين على الارض... اسمع يابندر هي كلمه ورد غطاها ماعاد ابي اشوفك ولا عاد ابي اسمع صوتك او حتى طاريك وكل كان بيننا اليوم انتهى... الانسان المخادع اللي مايقدر الصداقه ماله مكان في حياتي ابد. واذا كنت سويت هالحركه خايف انك تفقد جزء مني ياطفل ابيك تدري اللحين انك فقدتني للابد... طلع من الاستراحه بنفس الحال اللي دخل فيه واشرت لسامي وانا احس باارهاق شديد: اطلع معه الله يعافيك لا يسوق السياره وهو على هالحال بعد هو مب ناقص جنون فالسواقه.. لكنه رجع بعد دقايق يقول انه ماقدر يلحقه . انتشر الهدوء بعد طلعة خالد وكانوا يطالعوني مو عارفين وش يقولون كانوا مصدومين مثلي واكثر وقفت ويدي على قلبي حسيت اني مخنوق وانا احاول استجمع القوه اللي باقيه فيني قلت: عذرا ياشباب متاسف على الفصل البايخ اللي صار قبل سوي يالله انا ماشي... سالني سامي بتردد واضح: لحظه قبل لاتمشي يابندر صحيح الكلام اللي قاله خالد؟ هزيت راسي باءسى وانا امسك دموعي اللي عصتها شيمه الرجال وبابتسامه رديت: ليش استغرب منكم انكم تصدقون هالكلام فيني اذا كان خالد خوي الروح بروح قدر يصدقه؟؟ مع السلامه.. وطلعت. لحقني سامي..خلني اوصلك للبيت يابندر تراك على طريقي ..شكله حاس بتاءنيب الضمير وراحمني وهذا اللي مااحبه رديت .......لامشكور انا بخير لاتشغل بالك... وركبت السياره ومشيت فالبيت الوالده وريم كانوا فالصاله لما دخلت واستغربوا رجوعي بدري.. بعد السلام سالت الوالده بااهتمام؟ بندر يمه وش فيك؟ .ريم بعد قالت شيء زاد الالم اللي في قلبي;: عسى ماشر يابندر خالد فيه شيء؟...... حاولت امثل اني معصب.. انت ماتفهمين؟..كم مره اقولك ياريوم لا تتفاولين على العالم ياجماعه كل اللي صار ان احنا تفرقنا بدري الليله عادي وشفيكم؟.....قالت الوالده.ياوليدي وجهك متغير انا امك واحس فيك قلي ياامي من اللي مضيق صدرك؟.... يتبع.....

www.alhnuf.com

فرحة العنا · 01-02-2008, 05:28 م

الهنوف2007 ثنكيووووووو على القصة المحزنة و اتمنى اشوف التكملة

**عبووووورة** · 01-06-2008, 06:24 م

عزيزتي الهنوووووف 2007
اهلا وسهلا بك
ويسلموووو عالقصة الجميلة
وبانتظار التتمة لهذه القصة
وبانتظار المزيد من الابداعات
والى الامام دوما

زحمه يادنيا زحمه · 01-18-2008, 01:24 ص

الف شكر الهنوف القصه حلووووووه
ياليت ياقلبي تكملينها
والشكر موصول لك

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
صور ولا احلى اجمل الصور الطريفه الجزء الاول	احمد لبنان	المنتدى الفوتوغرافي - منتدى الصور	2	06-17-2007 10:41 م
أغرب الغرائب والطرائف الجزء الاول	احساس انسان	منتدى العجائب و الغرائب	20	02-23-2007 09:16 م
صور + تعليقات واضحك على كيف كيفك((الجزء الاول))	المحبوب	فيديو صور مضحكة صور طريفة الصور المضحكه	12	10-15-2006 05:57 ص
غيرت حياتي ( الجزء الاول)	مصطفي امام	قصص واقعية و روايات	0	05-24-2006 01:21 م
حكم و اقوال (الجزء الاول)	عطر المسك	منتدى الحوار - مساحة بيضاء	8	08-05-2005 05:44 م

أدوات الموضوع
مشاهدة صفحة طباعة الموضوع أرسل هذا الموضوع إلى صديق