صحيح أن الذهب صمتك ولكن الكلام ألماس

صحيح أن الذهب صمتك ولكن الكلام ألماس
وبين الصمت والكلمه تبعثرخافقي لمه

دخيل عيونك اللي ظللت برموشها الانعاس
تقول الي تقوله بس أريدك تنطق الكلمه

إذا ما هو عشانك وعلى شاني وشان الناس


على شان العيون الي تمنت طيفك تضمه


أخاف ان الزمن لو طال صمتك يلفظ ألأنفاس
واخاف ان الفؤاد الي سكنته ينحبس دم

حبيبي ضاقت الدنيا بعيني واعتراها الياس
لبس ثوب الحزن كل الوجود وضاق به حجمه

وانا مثل الغريق اللي تبلل والعروق يباس
حياتي بين صدك والرضا ما تقبل القسمه

وش الدنيا بدونك لا عدمتك غير هم وباس

قبل لا يعرفك خلك نسى فيها حروف اسمه

ويوم ألله جمعنا والتقى بقلوبنا الاحساس
توطنت الخلايا والجسد.والروح.والهمه
على صوتك رقص طيرالهوى بالصبح والأغلاس
ومن وصفك شرب وحي القصيد وطاب لي نظمه
هنياللقلم لي بك كتب والحبر والقرطاس
لقى حتى أكبر عيوبك يسمه الحسن عمه

وماتبغى فؤادي ينكسر غيره عليك أخماس
ألا..إلا..واغار من العطر لي يعجبك شمه
تجول بين ريضان المشاعرمثلما النسناس
حلالك كل شي...ألأعذاب العاشق وهمه

أحمد بن ظاهر المهيري