اسفه على التاخير
الجزء الثامن
=========
سمعت الباب يطق فتحته كانت امها..
العنود: ترى بكره الصباح بنروح المستشفى؟؟
نوف بتعجب: ليش؟؟
العنود: بنسوى فحص ماقبل الزواج
نوف: لازم!!
العنود: ايه يقولون لازم انه المأذون مايرضى يكتب عقد النكاح بدون التقرير
نوف: مايحتاج أنا اعرف فصيله دمي وهو يعرف فصيله دمه اكيد
العنود: الفحص مو عشان فصيله الدم الفحص عشان الامراض الوراثيه اللي بالدم
تنهدت نوف من غير ماتتكلم
العنود: يعني لازم يشوفون بينكم تطابق او لا؟؟..
نوف: طيب واذا ماكان في تطابق؟؟
العنود: يعني مافي زواج..
ابتسمت نوف بداخلعا بس مابينت لامها ..
بعد ماطلعت من عندها رجع لها الأمل انها تفتك من تركي وقالت بخاطرها يارب يكون التحليل سلبي وارتاح ويصير الرفض مو مني يارب..
=====================
طلعت من عند اخوها وهي مبسوطه اخيييرا وبعد عده محاولات وافق لها تروح عند ديم.. راحت خذت لها شور ولبست واتصلت على ديم تفتح لها الباب...
ديم: هلااا والله مشتاقتلك موووت
سراب: خلينا ندخل بعدين نعبر عن الاشواق
ديم: تبين نطلع غرفتي ولا نجلس تحت؟؟..
سراب: كيفك..
دخلتها بالمجلس وطلعت تجيب لها القهوه...
ديم: ترى الحلى خصيصا مسويته لك..
سراب: عساه لين اخاف يعور اسناني..
ديم تطالع باسنان سراب: تصدقين اسنانك مره تعدلت طالع شكلهم مرتب
سراب: واللـــــــــه
ديم: متى بتفكين التقويم قريب؟
سراب: مدري والله.. انتي فاتك الدكتور الموعد اللي راح دقها سواليف
ديم: غريبه اخبره ثقل
سراب: لاياديم أنا تفاجئت فيه راعي ضحك ومزح طول ماهو يعدل التقويم كان يسولف على..
ديم: وش قال؟؟..
قعدت تحكي لها عالموعد اللي راح وديم تضحك..
سراب: بس والله فيه ثقه بالنفس
ديم: طيب حلووو الرجال يكون واثق اجل تبينه خقاق
سراب وهي تتامل: بس والله شخصيته مره حلووه
ديم تطالع فيها بتعجب: لايكون حبيتيه؟؟..
سراب: يوه أنا قلت شئ..
ديم: مدري عنك سرحانه وتحكين عنه كنه فارس زمانه
سراب: لافي فرق بين هالانسان عاجبتني شخصيته وبين هو عاجبني
ديم وتقصد نوف بنت خالتها: لاترى هالحاله قد مرت على بالبدايه شخصيته خطيره بعدين تغرقين لشوشتك .. الله يستر
سراب: ديم لاتقولين كذا والله انتي فاهمه غلط
اكتفت ديم بالابتسامه..
سراب تحاول تغير الموضوع: ماعندك نيه تنزلين خاطره جديده؟؟..
ديم: الاسبوع اللي راح ارسلت لهم خاطره جديده عساهم ينشرونها
سراب: عاد انتي لك جمهور عريض في بيتنا
ديم: هههههههه انتي واخوك جمهور عريض
سراب: تصدقين مره ضايق صدري على بشاير مدري وش صار عليها هي وزوجها..
ديم: الله يعينها والله ماتستاهل..
سراب: تعالي طلعلك نتايج مواد ولا لا؟؟
ديم: طلع مادتين والحمدلله نجحت فيهم بقى ثلاث مواد الله يستر.. وانتي
سراب: تخيلي مانزل إلا ماده وحده..!!
=========================
ام احمد طالعه لبيت الجيران عند ام صقر واحمد كان بالدوام وعالساعه 8 مساء رجع البيت ماحصل امه وعرف انها طلعت توسع صدرها عند وحده من جاراتها دخل المطبخ يدور له شئ ياكله الشغاله سميره من يوم حست ان احمد جاي والبيت فاضي استغلت الفرصه ودخلت غرفتها وبعد شوي طلعت وتفأجأ احمد بشكلها كانت لابسه بنطلون جينز ضيق وفاتحه شعرها وتبتسم له...
احمد: خيييييييييييير انتي وين حنا قاعدين؟؟..
سميره: ماما في روح قبل نص سائه
احمد: أنا ماسئلتك عن امي أنا اقول وش هاللبس اللي عليك؟؟..
سميره: هذا ملابس حق أنا في جيب من اندونيسيا
احمد يأشر بيده: اقوووول ضفي وجهك وروحي غيري لايجيك كف
سميره: مافي معلوم أنا ايش كلام انتا
طالعها احمد بنظرات استحقار: هذا ملابس انتي في ماما هنا مافي البس ليش اللحين البس
سميره: أنا في بلاد أنا كده ملابس حلووو
احمد: امحق حلوووو
سميره: حلوووو والله بابا
طالعها احمد وهو وده يصفقها وطلع وصفق بالباب وهو يكلم نفسه اذا جت امي لي تصرف ثاني معك...
========================
المغرب في بيت ابو بدر...
ثامر: لاتحاول
تركي: اللحين ماكفاك المره اللي راحت صادم فيها
ياسر: والله ما راح أطول بيته قريب بعطيه غرض وارجع
ام بدر: ثامر الله يعافيك ابيك توديني لامي
ثامر: ان شاء الله يما...
ياسر: ثامر والله ربع ساعه وراجع
ثامر وهو يمد له مفتاح السيارة: يا ويلك ان تأخرت بودي امي...
ياسر وهو طالع: ان شاء الله
دخل تركي عليهم: باركوا لي جبت نتيجه التحليل .. والحمدلله تطابق
ام بدر+ ثامر: مبرووك
ام بدر: وكل هالوقت كنت بالمستشفى
تركي: لامريت الشقه بس ماعجبتني..
ثامر: وش فيها؟؟
تركي: اول مااخذتها حسيتها مناسبه بس اليوم ركبوا الاثاث فيها حسيتها صارت مره صغيره..
ام بدر: أنت زين لقيت شئ قريب.. وبعدين انتم توكم ببدايه الطريق اذا ماحسيتوها مناسبه اطلعوا منها
ثامر: شكلي بمر اشوفها اليوم قبل ماتجي زوجه المستقبل ويصير محرم علينا ندخلها
تركي: هههههههه اكيد بيصير حدك المجلس
ام بدر: طيب والسفر اكدت الحجوزات ولالا؟؟..
تركي: الااااا الحمدلله
بعد نص ساعه جاء ياسر وعطى اخوه المفتاح .. راح ثامر وركب سيارته ينتظر امه .. ولقى شريط محطوط مكتوب عليه "افضل الأغاني العربية"... شغله .. طلعت له ام كلثوم
ثامر: حلوو
بعدها جت أغنية لعبد الحليم .. ومن ثم محمد عبدو
ثامر: والله وطلع عنده ذوق اخوي
بعدها جت اغنية .. لصوت مهوب غريب عليه ... حاول يعصر مخه .. بس ما قدر
ثامر: لحظة .. هذا مهوب صوت ياسر ؟ .. إلا إلا .. والله ما تلعب يا ياسر ..
" افضل الأغاني العربية" اجل ؟؟ ..
جت امه وركبت معه .. شوي فتح ياسر الباب ...
ياسر: السلام عليكم .. ثامر بجي معكم عند جدتي بدال قعده البيت
ثامر وهو مبتسم: طيب اركب ..
بعد ما ركب ..
ثامر وهو يدخل الشريط: يما فيه اغنية عندي عجيبـة
ام بدر: لا ما نبي اغاني
ثامر: بس يا يما مهيب أي اغاني .. من اغاني ايام اول .. صراحة منقيها من افضل الاغاني العربية
ياسر بارتباك: ثامر .. في شريط هنا اسمه افضل الاغاني العربية .. نسيته بالسيارة عطني اياه
ثامر باستهبال: اثاريه حقك؟ .. وانا اقول منهو هاللي عنده ذوق وحاط هالأغاني الحلوة .. بس ما اعجبتني صراحة إلا اغنية " ابوصالح سرى ليله" .. بس ما عرفت مين اللي يغنيها..
ياسر: ايه هذا فنان توه طالع .. عجبتني اغنيته وسجلتها .. لو سمحت عطني الشريط
ثامر: متأكد فنان توه طالع .. بس صوته صغير.. يعني اعطيه 16 او 16
ام بدر: خلاص .. عطه وفكنا
ثامر وهو يضحك عطى ياسر الشريط ويقول بنفسه " لو تدرين يا يما وش بالشريط"....
ثامر: عاد لا تتعودها .. وتاخذها حلى ترى مو كل مرة تسلم الجرة .. هالمرة أنا مسكته .. المرة الجاية شف مين بيمسكه...
=====================
الساعه 11 بليل...
سرحانه ومهمومه العد التنازلي بدأ مابقى شئ على زواجها نتايج المواد كلها طلعت حملت ماده كله بسبب نفسيتها ايام الامتحانات .. مسكت جوالها اللي اهداه لها تركي وامها ماعارضت ولاقالت شئ لان الزواج قرب...
نوف عايشه بصراع فظيع مو عارفه كيف تقدر تتأقلم على حياتها الجديدة مسكت جوالها بتردد.. مره تقول بترسل ومره تقول لاااااا
وبعد صراع نفسي دام اكثر من ساعتين.. قررت انها ترسل مسج بس ياترى لمين؟؟!!!!!!!
" مرحبا يزيد
انا ما انكر اني حبيتك وما زلت أحبك
لكن أنا اللحين على ذمة شخص ثاني
وضميري يأنبني أستمر بهالعلاقة
يزيد.. اعتقد الى هنا وبس ..
انا بعد ايام راح اعيش مع شخص ثاني تحت سقف واحد
انا ما اقول هالكلام حباً بزوجي
لكن والله يعلم وش لك مكانة بقلبي
بس هالشي ما يعني اني استمر معك
قدري ان اكون لواحد ثاني
وانا عاهدت نفسي اني اتوب لله
علشان يوفقني دنيا وآخره
ودعائي لك من كل قلبي بالهداية والسعادة الدائمة
لا تنسانا من دعواتك .."
ضغطت زر الارسال بتدخل الرقم بس للاسف صغطت الزر مرتين فانرسلت الرساله لاول رقم بالقائمه عندها وكان رقم خالها احمد لانه بحرف الالف!!!!!!!!!!!!!!!
انصدمت الرساله راحت لخالها انرسلت بالغلط كانت بتدخل بالخانه رقم " يزيد" لانه مو مسجل عندها بس من السرعه ماانتبهت وانرسل لرقم لخالها حست الدنيا دارت فيها مستقبلها بيضيع جلست تضرب بيدينها على حافه السرير من القهر لدرجه ان اختها كانت نايمه جنبها وفتحت عيونها من قوه الضرب...
ريوف نصها نوم: وش فيك؟؟
نوف بصراخ: مافيني شئ نامي أنا ناقصتك
ريوف: كيفك بالطقاق
نوف بدت تصيح من القهر الموقف مره صعب اليوم بدال ماتنهي علاقتها مع يزيد بسلام اليوم راح تنفضح والكل بيعرف بسالفتها.. يارب استر علي أنا مو ناقصه .. لكن خالي احمد مايعرف رقمي بس ولوووو اكيد بيجي له يوم ويعرفه.. الحمدلله اني ماكتبت اسمي فيه.. اخاف يروح يطلع الرقم باسم مين وبكذا راح تصير مصيبه لان الرقم باسم تركي... الله يستر الله يستر.. يارب يمسحها على طول عشان مايحفظ الرقم يارب.. يارب
========================
احمد كان توه داخل البيت راجع من برى سمع صوت المسج طنشه طلع غرفته اخذ له شور وتمدد عالسرير بينام تذكر انه ماقفل جواله رفعه بيقفله شاف المسج فتحه وشاف ان الرقم غريب مايعرفه قرأ الكلام المكتوب وهو يهز راسه ويقول بخاطره الحمدلله الله لايبلانا...
رساله جايه بالغلط؟؟!!! والصدفه تطيح علي أنا.. مسكين زوجها هي اللحين على ذمته وتفكر بواحد ثاني.. بس اسلوب البنت انها ندمانه وبتتوب لربها وشكلها مستمره بالرسايل.. لكن الرسايل بعد باب من ابواب الشيطان
صكر الرساله ورجع الجوال عالكومادينه وهو يناظر السقف سرحان.. اكلمها انصحها؟؟.. لااااااا لاااااااا البنت تقول بتوب وانا اكلمها لا لا كيف أنا فكرت بهالشئ..
استغفر الله العلي العظيم..
الله يثبتها كانها ناويه توبه وينسيها اللي تكلمه ويحببها بزوجها يارب..
والله يستر علينا وعليها وعلى جميع بنات المسلمين..
قفل جواله وجلس يتقلب بسريره ياترى هل خطر في باله ان هالانسانه اللي ارسلت له بالغلط تصير له ولا لا؟؟.. يتحمد ربه مايبلاه ومايدري انها بنت اخته
سبحان الله صدفه غريبه والله يستر من اللي وراها..
=====================
الظهر ببيت بدر وابتهال...
روشت بنتها ولبستها ونومتها وزوجها طالع واللحين اجازه صيف وتحس بالفراغ قررت انها ترتب غرفتها وتغير اماكن الاثاث كنوع من التغير ابتدت بادراج التسريحه رتبتهم درج درج بعد كذا فتحت دولابها وجلست ترتب الملابس واخيرا وصلت للشناط قعدت تفضيهم خاصه شناط المدرسه مسكتهم وطلعت الاغراض الي فيهم ورجعت كل شئ مكانه بس لقت بالشنطه اللي اخذتها اخر يوم ورقه وهي بعد ذاك اليوم مافتحتها إلا اللحين..
على طول قرت الورقه وكانت من اخووو نفس الطالبه بس الاسلوب كل ماله ويتمادى اكثر.. تضايقت بداخلها قالت حتى يوم رفضت اخذ الرسايل منها يد ليد صارت تحطهم بالشنطه.. طيب وش يبون مني؟؟.. هم صح ماشافوني يوم كنت حامل قبل ثبلث سنوات لانهم كانوا بالمتوسط
بس مو معقوله انهم مايعرفون اني متزوجه؟؟.. ولايمكن يعرفون بس هالاشكال مايهمهم متزوجه او غيره اهم شئ وحده ساذجه يلعبون عليها..
دخل عليها بدر وهي ماسكه الورقه بيدها تفأجأت بدخلته عليها وعلى طول نزلتها..
بدر: السلام عليكم
ابتهال: هلا وعليكم السلام
بدر: سديم نامت؟؟..
ابتهال بارتباك: ايه
بدر: وش فيك انتي؟؟..
ابتهال: لامافيني شئ.. ارتب الغرفه
بدر: طيب يلاااا خلصي بسرعه بنطلع نتعشئ برى
ابتهال: وسديم؟؟
بدر: أنا بصحيها بس انتي خلصي شغلك...
======================
ديم جالسه لحالها بغرفتها وبخاطرها تقول..
الحمدلله تخرج وتخرجت ووظيفه مافي امل الاقي بهالسرعه مع ان تخصصي مطلوب بس هالوقت مافي شئ مضمون اللي معه واسطه يمشي الله يعين بس.. وحتى زواج ماتزوجت يعني مافي شئ الهى فيه لارجل ولاعيال.. الله يرزقني ان شاء الله
في ظل هالافكار طلعت بهذه السطور..
ربما لم أكن..ربما أبدا لن أكون وقد تحترق أيامي المقبله مثل العام الذي مضى..في رجاء..في أمل..في كذبه..وهم
والواقع يهزمني دوما....
أين أنت أيها الحظ؟!!!
أين أنت يامن يتحدث عنك الاخرون؟!
هل مازلت تسير نحوي أم أنك تعبت من طول المسافه التي بيني وبينك؟!
أعاتب من؟!... أعاتب في زمان الشح والحرمان..أعاتب قسوة أيامي على فجر الدموع..ويموت الحلم في عيوني قهرا..أناجي..احكي
اعتصر الآما..لأنني أعيش الواقع غير العادل..
صعبة تلك الحياة التي لاننال منها الإنصاف والعدل قاسية تلك الأيام التي تنتابنا
مع غمرة الاحزان...
أريد حلما يطفئ لهيب أيامي الحائره فالحزن يتدحرج في قلبي المحطم الذي رحل عنه طيف الامل..
عزمت أن ألملم شتات نفسي وأنهض من كبوة اليأس واضمد الجراح واخرس لسان الألم وأبدأ من جديد أهزم الصمت وأقهر اليأس..
ياقلب سوف يأتيك الفرج بعون الله مهما طال انتظاره فلا تيأس وليبقى لديك أمل قوي فستبتسم لك الدنيا وتأتي الأيام محملة بالسرور
بإذن الله...
وبعد هذه الآهات المتناثره التي جعلتني أغرق في بحر الحزن بل اصبحت اعتصر حزنا ولكن الإيمان بالله عندي أمل تهفوا نفسي إلى
بزوغه..ومازلت صابره في محطة الانتظار...
**( الوان الدنيا )
=====================
احمد: يماااا امس كنتي عند مين من الجيران؟؟..
ام احمد: عند ام صقر
احمد: شوفي يماااا تكفين ان بغيتي تطلعين من البيت الشغاله رجلها على رجلك
ام احمد: ياساتر اروح للجيران اخذها معي؟؟..
احمد: ايه يماااا مايصلح تجلس بالبيت الحالها
ام احمد: أنت مدري وش فيك حاط دوبك ودوبها
احمد: ترفع لي ضغطي مااطيقها
ام احمد: كل الشغالات يرفعون الضغط
احمد: هاذي بزياده
ام احمد: صراحه استحيي كل مارحت للجيران اسحبها وراي بيقولون فرحانه ان عندها شغاله
احمد: اجل اذا مااخذتيها خليهم يجتمعون عندنا
ام احمد: ان شاء الله يصير خير
احمد: يماا أنا مستغرب من نوف بنت العنود الملكه ماطلعت لتركي وحفله ماتبي وزاجها قرب ومااشوفها فرحانه...
ام احمد: وتركي وش لونه؟؟
احمد: تركي لاااااااا مبسوط بس ماقدرت افتح معه موضوع نوف اول شئ احسه تدخل بخصوصيات ثانيا مابس احسسه اننا ملاحظين شئ
ام احمد: والله مدري عنهم الله يوفقهم ويسخرهم لبعض
احمد: امييين
========================
اليوم هو الفرحه المنتظره بالنسبه لتركي اليوم بتنزف له نوف زوجه له على سنه الله ورسوله
من الصبح وهو رايح جاي يدور بالبيت يحاول يضيع الوقت مع ان الزواج مختصر في بيت اهل نوف بس هو فرحته الليله غير ينتظر الليل يجي بفارغ الصبر عكس ناس طول الليل ماناموا بس مو من الفرحه من الهم وضيقه الصدر بنظرها اليوم بتدخل حياه جديده لكن بنظرها حياه كئيبه اشبه بالسجن..
سبحان الله لو كل انسان عرف وش بقلوب الناس له كان كيف صارت حياتنا؟؟...
مر الوقت سريع وجاء الليل نوف الكوافيره عندها تحط اللمسات الاخيره عليها
مع ان الميك اب حقها كان حلووو وفيه فن إلا ان نوف كان باين على وجهها الارهاق والتعب حتى فستانها يوم لبسته كان بسيط جدا لانها ماراحت السوق إلا مرات قليله جابت الاشياء الضروريه يعني مااشترت زي مايسون العرايس...
بعد ساعه جوو خالاتها وجدتها وعمتها الوحيده عندهم البيت طلعت لها ديم غرفتها...
ديم تفتح الباب: اللـــــــــه اللــــــه وش هالزين
نوف دمعتها بعينها: ديم خايفه
ديم: هههههههه شكلك ياعمري تنتفضين
نوف: احس شكلي حوسه
ديم: بالعكس مرتب.. بس شكلك مانمتي زين
نوف بتنهيده: ايه لي كم يوم مانمت زين
ديم: طيب اللحين حاولي تكونين طبيعيه عشان الصور تطلع حلووه
نوف: بحااااول
ديم: كيفك اجل تركي بيطلع احلى منك
يوم قالت ديم اسم تركي حست نوف باشمزاز منه كل ماحاولت تنسى مصيرها وين بيقودها اليوم يرجعون يذكرونها...
دخلت ريوف: نوف شكلك صغيره مو زي العرايس
ديم: هههه اماااااااا اختك ذي عليها حركات
نوف: كلها بكبرها عاهه وقفت على ذا الجمله
ريوف: أنا توو رحت شفت تركي شكله كبير كنه ابوك مو زوجك
نوف مقهوره منهم كل شوي يطرونه عندها: ضفي وجهك اطلعي برى
ديم: لاتعصبين يانوووف عروسه وتعصب شكلك غلط
سرحت مره ثانيه تفكر بصيرها المجهول اللي قادوها له من غير اراداتها..
ياترى وش اخبارك يايزيد اللحين؟؟... تفكر فيني؟؟
تحبني مثل مااحبك ولالقيت لك وحده ثانيه؟؟...
قطع عليها سرحانها صوت خالاتها دخلوا يسلمون عليها وبعدها جت المصوره والكل تصور معها..
الهنوف: نوف الميك اب حقك مره عادي ماكنك عروسه
العنود تحاول تغطي على اختها: اييييه هي طالبه خفيف
ام بدر: بالعكس ماشاء الله طالعه اليوم تهبل
نوف: الله يسلمك ياخاله
الهنوف: والله اتكلم جد واضح انه الميك اب حقها مو ماركات عالميه شكله أي كلام..
العنود: ماعندك سالفه؟؟..
ديم بصوت عالي بتقهر خالتها: شكلك يجنن يانوف كنك عروس اجنبيه واثقه من نفسها مو العربيات يكبون انواع المساحيق..
الهنوف تقطع كلام ديم: والمصوره ان شاء الله بعد يطلع تصويرها زين .. مو صورنا تروح عالفاضي
نوف: ياخاله ترى مو لازم تتصورين.. أنا جايبتها لي مو لك
دق جوالها وكان المتصل اخوها نايف يعلمها ان تركي بيدخل عليها
بدأ قلبها يرجف بشده واطرافها صارت بارده وحالاتها حاله تقولون داخله حرب مو عروس...
دخل عليها ابوها واخوها نايف وتركي وخالها احمد اول ماشافت احمد نزلت عيونها وحست بقلبها انقبض تذكرت موضوع المسج اللي ارسلته له بالغلط من يومين..
قالت بنفسها قاعد يضحك ان شاء الله ماحس بشئ ولاعرف من صاحب الرقم..
==================
بهاللحظات كانت بشاير بغرفتها زوجها صكر جهاز الكمبيوتر اللي ماصار يجلس عليه مثل اول
بشاير: غريبه بتنام؟؟..
سعد: ايه خلاص دايخ
بشاير: مااشوفك تجلس عالنت مثل اول
سعد: لاتقهريني ياشيخه كم مره قلت لك المسن حقي انسرق
بشاير: طيب أنت مو تقول انك سويت جديد
سعد: اييييه بس كثير ايميلات مو حافظهم سويت جديد مااستفدت منه
بشاير: اهااااااا
سعد: المشكله ولد الكلب اللي سارقه ماعمري شفته اون لاين اضفته عندي بقوله خذ المسن حلالك بس ارسلي الايميلات المهمه اللي ابيهم بس ماعمري حصلته..
بشاير بخاطره مبسوطه انها بحركتها قهرته ورفعت ضغطه: طيب من هالناس المهمين اللي قاهر نفسك عليهم
سعد: شباب من زمان عنهم واثنين من العيال يدرسون برى وكنت دايم احصلهم.. بس اللحين ماعندي احد
بشاير: بس هاذولااا اللي مضيفهم
سعد: وش قصدك؟؟
بشاير ببرود: لا مو قصدي شئ بس اخوياك تقدر تكلمهم بالتلفون مايحتاج تقهر نفسك عشانهم
سعد: اقووول طفئ النور بس بنام انتي مو فاهمه شئ
طفت النور وبعد نص ساعه راح بنوم عميق استغلت بشاير الفرصه وراحت فتحت الجهاز وسجلت دخول للمسنجر وانتظرت تحميله وبعد شوي فتح بس للاسف انقهرت ماحصلت احد اون لاين انقهرت هي مو كل يوم تجيها الفرصه.. لقت 13 ايميلات واصله اغلبهم اعلانات جلست تشيك عليهم لما وصلت لايميلين نفس اللي تكلمت معه قبل اسبوعين.. وكان هذا مضمون الايميل الاول..
( مساء الورد عيوني..
سعد وحشتني مووت لك اكثر من اسبوع مادخلت
عسى المانع خير طمني عليك حبيبي.. )
طالعت بتاريخ الايميل كان قبل اسبوع تقريبا يعني هي لها اسبوعين من دخلت وتكلمت معها..
ارتفع ضغطها من وقاحه البنت واسلوبها..
والايميل الثاني ماكان يختلف عن مضمون الايميل الاول اشواق وحب وهيام و...
حسبي الله عليها الله لايوفقها تسرق الرجال من زوجته.. بس ليش اتحسب عليها يمكن هي مالها ذنب وزجي المصون هو اللي متعرف عليها ويمكن بعد ماتكون عارفه انه متزوج...
====================
فتح لها الباب واشر لها بيده ان تدخل دخلت وقلبها يتفطر من الداخل تحس انهم نزعوا قلبها منها بضغطهم عليها بالزواج.. كان الفندق شكله خطير من برى ويوم دخلت جوى انبهرت اكثر الغرفه مره ستايلها غريب وحلووو وخاصه انهم عارفين انها غرفه عرسان .. فارشين الورود عالسرير بس بالرغم من الجمال اللي حولها مو قادره تتقبل فكره وجودها مع هالانسان بمكان واحد قعدت تتلفت حواليها بعدين جلست عالسرير مسك تركي يدها سحبتها على طول حست بالاشمئزاز منه وهو حس بحركتها بس قال يمكن مستحيه او خايفه..
تركي : اكيد ماتعشيتي بطلب عشاء
نوف وعيونها عالارض: لاشكرا
تركي: لالازم
نوف ببرود: شبعانه
طنشها تركي ورفع السماعه دق على روم سيرفس وطلب لهم عشاء...
تركي: ماودك تغيرين ملابسك
نوف: ممكن تطلع
تركي: ماراح اطلع بدخل دوره المياه وانتي بدلي ملابسك
طالعته نوف ببرود وماردت عليه خلاص تحس دمعتها بعينها ومحد حاس فيها.. جلست تتامل فيه وهو داخل دوره المياه كان يسحب رجله وراه وهالشئ واضح للجميع باين انه انسان مو طبيعي ..كل حركاته تشعرها بالنفور مو قادره تتقبله مو قادره تتقبل حركاته..
قعدت تكلم نفسها الله يصبرني يارب
فتحت شنطتها الصغيره اللي معها وطلعت منها بيجامه حرير لونها تفاحي واكمامها طويلة ولبستها.. امها كانت مجهزه لها بالشنطه قميص نوم لونه سكري ناعم بس هي عناد لبست البيجامه وتركت القميص..... طلعت المزيل وجلست تمسح الميك اب..
طلع تركي من دوره المياه واستغرب لمن شاف شكلها لاهيئتها ولاحركاتها تدل انها عروس التزم الصمت وبعد دقايق كان العشاء واصل...
تركي: تفضلي
نوف: شبعانه تعشى أنت
تركي: اقول تعالي كلي شكلك لك اسبوع مااكلتي
نوف: قلت لك تعشى أنت بالعافيه
تركي: نوف تعالي كلي لو لقمه
ماردت عليه وكملت مسح وجهها..
تركي: تعالي اشربي لو عصير
قربت نوف من الاكل ومدت يدها لكاس العصير...
===================
ملت من الانتظار بدون نتيجه يوم جت تسجل خروج شافت احد اون لاين وكان نفس الايميل حمدت ربها انها لحقت عليها لازم تتأكد علاقه زوجها مع هالبنت بس محادثه ولايكلمها ويقابلها هالشئ مشغل بالها وزوجها انسان غامض مستحيل تأخذ من حق ولاباطل...
كل ماناظرت في ابعد مدى من طموحي اصطدم بالمستحيل... اهلييييييييييييييييييييييييييييييييين
بيبقى محلك مثل ماهو محلك وعد لاسوي لك من الغيم جدران... هلا
كل ماناظرت في ابعد مدى من طموحي اصطدم بالمستحيل... وينك سعد لك اسبوعين مختفي؟؟
بيبقى محلك مثل ماهو محلك وعد لاسوي لك من الغيم جدران... ظروف
كل ماناظرت في ابعد مدى من طموحي اصطدم بالمستحيل... طيب اقل شئ ارسل لي ايميل طمني
بشاير تكلم نفسها شكلي ظلمته مايكلمها ولاشئ لو كان يكلمها ماكان سألت بهاللهفه.. بس أنا ماشيه معهاهم للاخر بشوف وش نهايتهم.. انتبهت ان المسن قدامها يأشر لان الطرف الثاني تكلم
كل ماناظرت في ابعد مدى من طموحي اصطدم بالمستحيل... قلبي وينك؟؟
بيبقى محلك مثل ماهو محلك وعد لاسوي لك من الغيم جدران... لهالدرجه اهمك؟؟
كل ماناظرت في ابعد مدى من طموحي اصطدم بالمستحيل... أنت وش قاعد تقول لي كم يوم قلقانه عليك وافكاري توديني وتجيبني واخرتها تقابلني بهالبرود
بيبقى محلك مثل ماهو محلك وعد لاسوي لك من الغيم جدران... أنا زعلان عليك لوكنتي مهتمه فيني جد كان عرفتي وش تسوين
كل ماناظرت في ابعد مدى من طموحي اصطدم بالمستحيل... سعد لوسمحت تناقشنا بالموضوع هذا كثير.. تلفون ماراح اكلم أنا ماخذه رقمك ووعدتك وعد اذا احتجت شئ ولاضاقت فيني الدنيا أنت اول واحد الجئ له...
بيبقى محلك مثل ماهو محلك وعد لاسوي لك من الغيم جدران... كيف قلبك طاوعك تتركيني وماتسالين عني
كل ماناظرت في ابعد مدى من طموحي اصطدم بالمستحيل... تبي الصراحه قبل ثلاثه ايام قررت اتصل عليك بس بالاخير تراجعت
فجأه سمعت بشاير صوت طالع من غرفتها خافت ان زوجها قام من النوم صكرت المحادثه بسرعه وقطعت الاتصال.. راحت الغرفه تتاكد لقت زوجها بسابع نومه شكله تحرك وطيح شئ عالارض..
انسدحت على سريرها وهي فيها فضول تعرف اشياء ثانيه بس الايام جايه والله لاقهركم مثل ماقهرتوني..
=====================
صحت من النوم وتحس ان جسمها منهد عقب زواج تركي امس صح ان الزواج كان مختصر بس تعبوا فيه كفايه لهم فتره وهم يراكضون معه بتاثيث الشقه والاشياء الضروريه..
قالت بخاطرها الله يوفقهم يارب ويرزقني رفعت سماعه التلفون واتصلت على بيت سراب وسكتت تنتظر احد يرفعها...
عبد العزيز: الووووو
ديم: السلام عليكم
عبدالعزيز عرف الصوت: هلا وعليكم السلام
ديم: سراب موجوده؟؟..
عبدالعزيز: مين معي؟
ديم: ديــــــــم
عبدالعزيز: لحظه
وبعد ثواني...
سراب: هلالالالالالالا
ديم: هلا والله .. اخوك رد علي خفت الصراحه اول مره يرد علي
سراب: حتى أنا استغربت انه رد عليك لان هو بالعاده اذا شاف الكاشف ارقام صديقاتي مايرد..
ديم: اهاااااااااا
سراب: ياشيخه أنا قايلتلك اخوي معجب بس انتي ماصدقتيني
ديم: هههههههه ليش اخوك الدكتور ماجد وانا سراب
سراب: ههههههههههههه
ديم: ماسالتيني وش صار امس بالزواج؟؟
سراب: ايييه صح مبروك عقبالك
ديم: الله يبارك بحياتك
وجلست معها حوالي نص ساعه تحكي لها وش صار امس بالتفصيل..
====================
الجزء التاسع
==========
دخل البيت مبسوط شايل اكياس بيده اليمنى وماسك مجله باليد الثانيه دخل الاكياس للمطبخ وبسرعه توجه لغرفته اليوم نشروا لديم خاطره جديده وبالصدفه طاح عليها عبدالعزيز وهو يتصفح المجله بالسوبر ماركت...
فتح المجله عالصفحه اللي فيها الخاطره وجلس يقرأها باهتمام شديد...
بترككم مع الخاطره..
لم اتصور يوما.. ان يكون الغرق بهذا القدر من الألم!!.. شعور غريب..
لايدرك إلا بانعزال الحواس عن العالم المحيط!!
تظن امواج البحر نفسها انها هي المنقذه..
تحاول جمع اشلائي والتاكد من انها كامله..
ولكنها لاتعلم انها بفعلها ذلك تزيد تشتتي...
بل وتزيد عدد اجزائي وتدخل روحي اماكن لم تزرها من قبل..
كثيرة هي القوراب التي تتراى امامي
ولكنها هي الاخرى لاتملك ان تنقذني
حتى طيور النورس احزنها الحال...
وهاهي تروح وتغدو لتتاكد من اني لازلت على قيد الحياه!!
لم يثنها ضعفها عن تقديم المساعده حتى ولو كانت
لاتفيدني شيئا!!
يالها من طيور وهاهي الريح تحاول ابعادي
علها توصلني إلى الشاطئ
مسكينه!!
لم تعلم بان مااحمله في قلبي يثقلني عن المسير على الارض
فكيف بي وانا اغرق!!!
فليترك البحر امواجه واقاربه وسمائه
وقيعانه واسماكه ومرجانه
ويلتفت لغرقي..
اريده ان يتصور فقط حجم الألم الذي سببه باهتمامه بي...
ذلك الاهتمام الذي اعجبني واعياني!!
ثم يقرر بعدها اين سيكون موقعه من تلك المعمعه..
اوفليخلصني من قيدي
فلا يزال هناك متسع للالم..
**( طوق الياسمين )
قعد يعيد قرأة الخاطره اكثر من مره حس بضيق بصدره الاسلوب هالمره مختلف عن المره اللي راحت اول كنت احسها تعيش فراغ عاطفي كبير واللحين البنت بقلبها احد ميه بالميه تحب.. واضح انها تقصد احد معين أنا لازم اتأكد مايصير كذا اعلق نفسي بوهم.. شكلها هي بعالم ثاني وتفكر بواحد ثاني وانا الغبي افكر فيها!!!..
طلع من الغرفه من غير تفكير توجه غرفه اخته طق الباب..
سراب: ادخل
عبدالعزيز: السلام عليكم
سراب: هلاوالله.. غريبه وش عندك زايرني اليوم؟؟..
عبد العزيز: سراب .. اممممم
سراب: وش فيك؟.
عبدالعزيز: بسألك سؤال وياليت تجاوبيني
سراب: اسئل واذا اقدر بجاوب
عبدالعزيز باحراج: ديم ... مخطوبه؟!!
سراب بتعجب: لا ليش أنت سامع شئ؟؟
عبدالعزيز: طيب... خليك صريحه معي لان اجابتك تهمني...
سراب: وش فيك أنت اليوم صاير غريب
عبد العزيز: هي بقلبها احد يعني بالعربي تحب احد
سراب: اتوقع ان هاذي خصوصيات مفروض مااقولها
عبدالعزيز: يعني تحب؟؟؟
سراب: ماراح اجاوب
سحب عبدالعزيز نفسه راجع غرفته بخيبه امل...
وبعد دقايق فتح الباب على سراب وبيده المجله حطها عالمكتب وطلع...
===================
ام احمد طلعت لدوريه الجيران الاسبوعيه.. واحمد كان بغرفته يكلم بالتلفون فجأه دخلت عليه الشغاله سميره من غير لااحم ولادستور وشايله بيدها ملابس احمد جايبتهم من الغسيل..
احمد يطالعها والسماعه بيده وشكله مصدوم من حركتها: الوو.. يؤ يؤ يؤ...اسمع اكلمك بعدين
حطت الملابس عالسرير وهي تطالع باحمد بنظرات غريبه..
احمد: كيف تدخلين الغرفه من غير استئذان ؟؟!!!
قربت سميره من احمد: أنا في جيب ملابس هق انتاااا
احمد بصوت عالي يأشر لها: انتي كلام ماما جيب هنا
سميره تمثل انها تصيح: أنا سوي كلوو نظيف بسرءة عشان انتا فرهان بس انتا ما هوبي انا
احمد: شغاله اكييد بتنظفين اجل ليش جايبينك تاكلين وتشربين..
سميره: ليش بابا اهمد مافي ابي أنا مافي كلام كويس سوا سوا انا
احمد: اقول اطلعي برىىىىىىى
سميره تقرب من احمد وتمسك يده: اهمد أنا من زمان هوبي انتا كتييير بس أنا مافي كلام أنا خوف...
احمد مصدوم: وش هالكلام؟؟..
سميره دموعها تنزل: انتا دايم مافي كلام أنا كويس أنا بس شغل تئبان ... والله أنا هوبي اهمد كتتيييييييير
احمد يدفها برى الغرفه ويقفل الباب....
==========================
دخلت العياده وكان الدكتور جالس على مكتبه وفاتح اللاب توب اول ماحس احد دخل عليه رفع عيونه...
د/ ماجد: .. مين؟؟
سراب تفك نقابها: سراب... مو موعدي اليوم ولا غلطانه
د/ ماجد يطالع بجدول المواعيد: تفضلي
سراب جلست على سرير الكشف وقربت منها النيرس تنزل لها مستوى السرير..
د/ ماجد: افتحي فمك
سراب: دكتور كم باقي وافك التقويم
د/ ماجد: مستعجله!!
سراب: ايه خلاص مليت منه لي سنه ونص مركبته..
د/ ماجد: لا يبي لك كم جلسه
بدأ الدكتور يشوف شغله والتزمت سراب الصمت لانها مو قادره تتكلم والدكتور يعدل اسنانها..
النيرس: Doctor I think my teeth it's need to check!!
د/ ماجد: Why ?
النيرس: because it's look terrible!
د/ ماجد: ahaa .. OK .... اذا حجت البقر
ابتسمت سراب على اسلوبه...
د/ ماجد: اذا حجت البقر.. عندنا حنا الشيبان يعني مافي امل
سراب تقول بخاطرها على باله يقول شيبان يبيني اقوله توك شباب: ايه معروفه الكلمه كثير يستخدمونها
د/ ماجد: خلاص خلصنا
سراب: دكتور ابيك تسوي لي تبيض لاسناني بعد ماافك التقويم
د/ ماجد: لامايحتاج اسنانك لونها مقبول
سراب: بس اذا ابتسمت يبان اللون مره
د/ ماجد من غير مايطالعها: بالعكس ابتسامتك حلووه
انحرجت سراب منه وقامت من سرير الكشف لبست نقابها...
======================
امس وصلوا لبنان بيقضون فيها شهر العسل هو مو شهر بالضبط اسبوع اكثر او اقل هالشئ راجع لهم انبسطوا وتأقلموا مددوا المده ماارتاحوا رجعوا ..
جالسين على شاطئ الشاليه اللي اخذوه من يوم ماوصلوا كانت نوف تتامل البحر وهي سرحانه وتركي يلتفت عليها كل شوي ويلقاها على نفس حالها..
تركي: نوف .. نــــــــــوف
نوف تلتفت من غير ماتتكلم..
تركي: ماطفشتي؟؟.. ماودك ندخل
نوف: ادخل أنت أنا الجو هنا عاجبني
تركي: نوف وش فيك مو مرتاحه هنا تبين نغير المكان؟؟..
نوف من غير ماتطالع فيه: بالعكس المكان هادئ ورمانسي وحلوو
تركي: الحمدلله انه عاجبك
لحظات صمت..
تركي: نوف .. وش فيك مستحيه مني؟؟..
نوف: لا عادي
تركي: مدري من يوم ماتزوجنا ماطلبتي مني شئ
نوف باستهزاء: اللي يسمعك يقول لنا سنين متزوجين ماكنهم اربع ايام
تركي حس بنبره الاستهزاء: طيب هذاك انتي قلتيها لنا ايام.. انتي اللي يشوف شكلك اللحين يقول لنا سنين متزوجين وعلى وشك طلاق بعد..
نوف بقلبها الله يسمع منك
====================
لبست تنوره ميدي لنص الساق لونها بني وتيشيرت اورنج وحطت على وجهها كحل وقلوس خفيف ..نزلت للمطبخ بتجهز القهوه والحلى لان صديقاتها بيجتمعون اليوم عندها طلعت الحلى من الثلاجه وجلست تقسمه بصحون دخل عليها ثامر اخوها..
ثامر يمد يده بياخذ: حلى وحركات
ديم: لااااااااا ثامر لاتخربه البنات بيجون بعد شوي
ثامر يطالع بملابسها: وش لابسه انتي؟؟!
ديم باستهبال: ثوب وغتره
ثامر: تستهبلين انتي ووجهك
ديم: اندري عنك وشوله تسأل؟؟
ثامر: تنوره قصيره وين قاعدين حنا؟؟
ديم باستهتار لانها ملت من اسلوبه وانتقادته لها: بالبيت..
ثامر: انتي كل لبسك كذا اما بنطلون ولاتنوره قصيره ولابرمودا ماعندك لبس زي الناس
ديم: أنت وين عايش ماتشوف العالم وش تلبس اللحين
ثامر: روحي غيري ملابسك
ديم: ماراح اغير الحمدلله أنا محترمه نفسي كل لبسي معقول بناطيلي دايم واسعه والتنانير نص الساق وش تبي اكثر من كذا
ثامر: مو باقي إلا ننتظرك تلبسين الشورت وتقولين مافيها شئ
ديم بقله صبر: ثامر لاتقعد تتفلسف رجاء
ثامر: اقول روحي غيري بس قبل مايجون خوياتك
ديم: سبحان الله أنت تعرف تصير مفتي باي شئ متعلق بي وماتشوف نفسك..
ثامر: الحمدلله وش فيني أنا؟؟..
ديم: ابد كامل .. يعني أنت ماتسمع اغاني!!.. ماتسبل ثوبك!!.. شف ثوبك ثوبك يسحب كنه ذيل فستان
ثامر: هاهاهاها ضحكتيني تنكتين انتي ووجهك
دخلت عليهم ام بدر: وش فيكم انتم بعد؟؟
ثامر: شوفي بنتك وش لابسه
ديم: يماااااااااا شوفي لك حل معه
ام بدر تطالع بديم: عادي مافيها شئ صديقاتها بيجون هي ماراح تلبسه عند رجال
ثامر: يماااا انتي بتخربينها
ام بدر بتلهيه: تعال برى ابيك بسالفه..
رجعت ديم تكمل شغلها وبعد ربع ساعه وصلت سراب وبعدها بنص ساعه جت بشاير...
ديم: بنات كلوا حلى قاعده نص ساعه اصلحه واخرته يقعد
بشاير: اكلت أنا يجنن لذيذ
سراب: وانا والله مااقدر من يومين شاده التقويم اسناني تعورني
ديم: على الطاري وش اخبار يوميات الدكتور ماجد
سراب بابتسامه: عادي ماصار شئ مهم
بشاير: ياجرائتك ياسراب تعالجين عند دكتور وسعودي بعد..
سراب: وش اسوي أنا اللي اخترته هم اللي لعبوا بحسبتي كل فتره يغيرون طبيبي
ديم: بس هالمره اشوفك مرتاحه وماتشتكين منه
سراب بنظرات حالمه: تبون الصراحه يابنات
بشاير تطالع بديم وتبتسم: ايه نبي الصراحه
سراب: صرت احسب الايام لمن يقرب الموعد ولمن اروح العياده ينتابني شعور غريب احس اني اعرف الدكتور من زمان اسولف واخذ واعطي معه عادي بالبدايه كنت اقول مثل عبدالعزيز بس اللحين لا...
ديم كاتمه ضحكتها: وشلون يعني اللحين غير
سراب بتردد: يعني.. يعني.. مدري وش اقول
بشاير: البنت غرقانه لشوشتها
ديم: ههههههههههههههههههههه
سراب تغير لو وجهها: وش فيكم تضحكون؟؟..
ديم: ياشيخه طحتي ولاحدش سمى عليكي
سراب: لامو كذا بس مدري ليش يعجبني كل شئ فيه شخصيته اسلوبه ثقته بنفسه حتى ريحه عطره تجنن...
ديم+ بشاير: هههههههههههههههههههههه
ديم: وتقولين ماتحبينه بعد.. إلى هنا نوقف ريحه عطره!!... ياحبيبتي انتي وصلتي لمراحل متقدمه بالحب
بشاير: وش بعد يعجبك فيه كملي
سراب: لاااااا ماراح اقول تتطنزون علي
ديم: اصلا مابقى شئ ماقلتيه اليوم كبيتي العشاء بقوووه
سراب: خلاص ماراح اتكلم الشرهه على صايره شفافه معكم
بشاير: بنات المره الجايه تجتمعون عندي ان شاء الله
ديم: أنا مااضمنلك
سراب: وانا عزيز بالمضاربه يخليني اجي عند ديم .. يعني مااتوقع
بشاير: اللحين اخوك مايرضى لك تجين عند صديقاتك وعادي يخليك تعالجين عند طبيب سعودي
سراب: ومن قال انه يدري ماعلمته..
ديم: معقوله إلا الان ماعرف!!
سراب: هو المرات الاولى كان يروح معي كانت طبيبه تعالجني وبعدها غيروه وصار سوري وعلمته تضايق بالبدايه بعدين رضخ للامر الواقع وبعدها ماقلتله شئ..
ديم: وااااااااو لو يدري وش تتوقعين يسوي؟؟
سراب: اتخيله لو يدري يفتح فمي ويسحب اسناني مع التقويم ويقول بلا هم بلا دكتور..
بشاير: الله يعينك على اخوك...
سراب: على طاري اخوي امس جاء سالني سؤال غريب عنك ياديم
ديم: وش قال؟؟..
سراب: بالبدايه سالني عنك ان كنتي مخطوبه يوم قلتله لا.. قال اجل تحب..
بشاير: وكيف حكم عليها
ديم: هو قاري خاطرتي الاخيره اللي نشرتها...
سراب: اتوقع لانه هو جاب لي المجله من غير مااقوله
بشاير: اماااااااا سراب انتي واخوك عايشين بعالم العشاق
ديم تغير الموضوع: بشاير وش صار عليك انتي ورجلك؟؟...
بشاير: اسكتوا يابنات ياانا رفعت ضغط سعد
ديم: وش هببتي بعد؟؟
بشاير: تذكرون يوم اقولكم غيرت الباسورد.. من يومها وهو يلعن ويسب اللي اخذ ماسنجره
سراب: والله لو يدري انك انتي بتصير مصيبه
بشاير: بس ماتدرون قد ايش استلذ ان شفته منقهر .. والايام جايه والله لاقهره مثل ماقهرني..
جلست تحكي لهم بشاير كل شئ صار لها مع صاحبه الايميل المجهول والبنات متحمسين....
=====================
احمد: حلفت يمااااا
ام احمد: صم ثلاث ايام
احمد: قلت والله مالها جلسه بالبيت
ام احمد: طيب ليش
احمد: بس كذا اكرهها ماارتاح لها
ام احمد: والله لو انها ذابحه ابوك تكرهها هالكثر
احمد: اكثر يمااااا اكثر
ام احمد: والله سميره مافي مثلها تعرف لي زين مو مثل غيرها
احمد: انا مااشوف فيها زود.. برجعها للمكتب
ام احمد: والبيت بيصير على راسي أنا
احمد: أنا اغسل المواعين ان شاء الله اكنس لك الحوش بس هي تذلف
ام احمد: ايه أنت تقول كذا واذا جاء الجد ماحولك احد
احمد: اجيب لك غيرها
ام احمد: اذا كذا خلاص .. بس حرام توديها المكتب خساير فلوس علينا..
احمد: اجل وش نسوي فيها نخليها تطر عند المسجد
ام احمد: لا خل نعطيها وحده من خواتك
احمد: سوي اللي تبينه المهم ماتقعد بالبيت
طلع احمد ورفعت امه سماعه التلفون تكلم بنتها الجوهره ام بدر..وحكت لها السالفه ان احمد موب طايقها ولايبيها تجلس بالبيت.. بعد ساعه جت ام بدر وثامر واخذوا الشغاله معهم .
=====================
طفشانه من الجو اللي عايشه فيه ودها ترجع الرياض اليوم قبل بكره بس العلاقه بينهم ماتسمح لها انها تطلب منه هالشئ... قامت فتحت شنطتها وطلعت منها ملابس باين انها ملابس طلعه مو حقه بيت...
تركي: على وين ؟!!!
نوف: ابطلع .. مخنوقة ابشم هواء
تركي بعد استيعاب: كيف يعني مخنوقة ؟
نوف بصراخ: ياخي ما احب الدخان ما اطيقــــه .. مااااا اطيقـــه
تركي وهو يطفي السيجارة: وهذا الدخان وطفيناه .. افتحي الشبابيك وبيدخل هواء نظيف
نوف: ايش يعني ما رح أطلـع
تركي وهو قايم: لا بنطلع .. يلا مشينا
نوف: لاخلاص هونت ماراح اطلع...
استغرب تركي من تصرفها لكن هي كان عندها نظره غير ماتبي تمشي جنبه والناس يشوفون اعاقته كانت تستعر من هالشئ يضايقها ان الناس يأشرون عليهم ويقولون شوفوا الرجال كيف يمشي... وكل هاذي تخيلات برأس نوف ولا الناس ماجابوا خبره ولاقد احد انتبه له.. غريبه هالبنت عشانها هي مو طايقته تحس الناس كلهم ينظرون له نفس النظره...
قطع عليها سرحانها صوت الباب انفتح التفتت عليه لقت تركي بيطلع ضاق صدرها انها بتقعد الحالها...
نوف: تركي.. تــــــــركي
تركي من غير نفس: نعم
نوف: بتطلع!!
تركي: ايه.. تبين شئ
نوف بتردد: بطلع معك بس أنت رح اول وبعدين أنا الحقك
تركي : وايش معنى
نوف بارتباك: بس كذا...
تركي: أنا بطلع برى بخذ تكسي واطلع برى الشاليه انتي وشلون بتلحقيني
نوف بخيبه امل: خلاص نطلع سوى...
طلعوا مع بعض وقرب منها تركي مسك يدها وسحبتها منه وهاذي ثالث مره تسوي فيه هالحركه !!!!
ماتلاحظون انه عاطيها وجه زياده عن اللزوم الله يقلع ابوالحب اللي يخلي الواحد ينذل كذا
" يضرب الحب شوو بيذل" على قوله كاظم الساهر
==================
دق التلفون جنبها رفعت السماعه وكان المتصل عمتها..
ديم: هلا عمتي وشلونك؟؟.. وش اخبارك؟؟
ام طلال: بخير الحمدلله.. مبروك التخرج..
ديم: الله يبارك بعمرك عقبال بسمه ان شاء الله
ام طلال: ان شاء الله... ابوك موجود؟
ديم: لاوالله قبل شوي طلع
ام طلال: زين اجل سلمي على امك واخوانك..
ديم: يوصل
ام طلال: مع السلامه
ديم: مع السلامه
قفلت الخط من عمتها وهي منحرجه من اسلوبها ومعاملتها الحلوه اللي ماتأثرت برفضها لولدها... رفعت السماعه وضربت رقم بيت سراب والحمدلله رفعتها هي نفسها..
سراب: جبنا سيره الاقط جانا ينط
ديم: لاحووووووول حتى اسلوب ماعندك
سراب تطالع باخوها: ديم لحظه بحول الخط على غرفتي
.
.
سراب: اهلين.. كان عندي عزيز.. اخوى موب صاحي ناشب لي من كم يوم
ديم: وش يقول؟؟..
سراب: يسأل السؤال ماغيره ديم تحب احد ولا لا؟؟.. وانا اجاوبه جواب محايد اقوله مايخصك
ديم: انتي ليش تخلينه يأخذ عني فكره ويصدق اني احب احد مو كفايه السالفه اللي بغت تودينا بستين داهيه
سراب: هو ماله دخل شئ مايخصه..
ديم: لاتكفين ياسراب فشيله علميه قولي له ماعندها سالفه تكتب خواطر تفضفض عن اللي بنفسها..
سراب: بس تبين الصراحه لمح لي انه يبي يخطبك
ديم: أنا!!
سراب: لا الجدار اللي وراك...
سمعت ديم صوت الباب الخارجي انفتح ودخل اخوها بدر وابتهال وسديم جت تركض عند عمتها...
ديم: هلا سدوم حبيبتي
رجعت ديم للتلفون: سراب اكلمك بعدين اخوي ومرته عندنا..
سراب: اوكي مع السلامه
ديم: مع السلامه
بدر: اجل وين اهل البيت
ديم: فوق...
ابتهال: ايه اليوم البيت هادئ على غير العاده
ديم: تعالي سدوم فوق معي نجيب ريان
بدر: ديم جدتي عندكم؟؟..
ديم: لا
ابتهال: مو هاذي شغاله جدتك؟؟..
ديم: الاااااا صارت سالفه هم مايبونها واخذتها امي
بدر: شكلها مايريح
ديم: ههههههههه نفس كلام خالي
========================
فتحت بشـاير الماسنجر حقها – او حق زوجها سعد بالأصح - .. ولقت صاحبة الإيميل المجهول أون لاين ..
بشاير: اعوذ بالله .. انتي شكلك وانتي تصلين حاطة الكيبورد قدامك وتطقطقين برجلينك
لو امدح الدنيا على طول الأيـام ,, ما ألحق جزاها يوم عرفتني عليك: هلاااااااا وغلااااااا .. تو ما اسفر ونور المسن عندي
راحت بشاير وغيرت النك بسرعة وحطت
من قالك مالحب الا للحبيب الأولي ؟! .. يا خامس احبابي .. معك نسيت حبك الأربعة ...: هلا فيـك أكثر ..
بعد صمت دام 5 دقايق .. رجعت البنت وتكلّمت
لو امدح الدنيا على طول الأيـام ,, ما ألحق جزاها يوم عرفتني عليك: شخبـارك سعد ؟
من قالك مالحب الا للحبيب الأولي ؟! .. يا خامس احبابي .. معك نسيت حبك الأربعة ...: تمام .. أخبارك انتي؟
لو امدح الدنيا على طول الأيـام ,, ما ألحق جزاها يوم عرفتني عليك: بخير دامك بخير
سعد ممكن أسألك سؤال؟
من قالك مالحب الا للحبيب الأولي ؟! .. يا خامس احبابي .. معك نسيت حبك الأربعة ...: أسألي
لو امدح الدنيا على طول الأيـام ,, ما ألحق جزاها يوم عرفتني عليك: ليش أنت متغير علي ؟!! .. بحياتك ما كلمتني بهالبرود ! .. ويوم استحملت وقلت يمكن ظروف عندك .. تحط هالنك ؟
بشاير بتتأكد أن كانت تدري أنه متزوج ولا لا
من قالك مالحب الا للحبيب الأولي ؟! .. يا خامس احبابي .. معك نسيت حبك الأربعة ...: اممم .. بصراحة أنا ابتزوج
لو امدح الدنيا على طول الأيـام ,, ما ألحق جزاها يوم عرفتني عليك: بتتزوج !!!!!!! .. وانا .. وبدور يا سعد وبدور ؟؟؟؟؟؟!!!!!!!!
من قالك مالحب الا للحبيب الأولي ؟! .. يا خامس احبابي .. معك نسيت حبك الأربعة ...: شوفي يا بدور .. أنا داري وانتي دارية ان لا يمكن احد يتزوج عن طريق النت
لو امدح الدنيا على طول الأيـام ,, ما ألحق جزاها يوم عرفتني عليك: ما كان هذا كلامك اول .. ومع كذا أنا ادري عن هالشي .. بس أنت توك صغير 25 !!
ارتاحت بشاير شوي " اشوى .. يعني معظم المعلومات اللي عاطيها عن نفسه خطأ"
========================
ديم تفكر بكلام سراب .. أنا صايره افكر فيه كثير لكن ماتوقعت اني خطرت بباله وسؤاله عني هاليومين اكيد عشان خاطرتي الاخيره عرف فيها اني افكر بواحد مو مهتم فيني!!
ااااااااااه لويدري انه هو المقصود... معقوله سراب تكون صادقه انه ناوي يخطبني ولاتستهبل علي اعرف حركاتها تحب الهبال...
سحبت المجله وجلست تقرأ خاطرتها من جديد بتشوف وش فهم بعد منها
وحتى سراب ماكانت احسن حال منها بالها مشغول لكن بشخص ثاني.... ماتدري ليه الدكتور ماجد شاغل تفكيرها هاليومين معقوله هي تحبه؟؟..
لا اكيد مجرد اعجاب وشئ طبيعي يكون هذا شعوري اول رجال غريب اجلس معه واتكلم معه..
يارب مااكون احبه يارب مايكون كلام البنات صحيح....
يارب
======================
من بكره سراب وامها جوو عندهم البيت طلعت سراب عند ديم فوق .. وجلست أمها مع ام بدر .. ما طولوا عندهم .. بعد ما طلعوا دخلت أم بدر عند بنتها ..
ام بدر: انتي عارفه هم ليش جاينا اليوم؟؟..
ديم: عادي مو زياره عاديه
ام بدر بابتسامه: ماقالت لك سراب شئ
ديم: أنا حسيت لانها جتني قبل كم يوم واليوم جايين بس بالاخير قلت عادي
ام بدر: هم جايين يبونك لعبدالعزيز
ديم: أنا.. طيب ليه سراب ماتكلمت..
ام بدر: حتى أنا توقعت يكون عندك خبر... هااا وش رايك؟؟..
ديم: خليني افكر
ام بدر: فكري براحتك وصلي استخاره وانا بعد بقول لابوك واخوانك
طلعت امها من عندها وهي مستغربه من طريقتهم بالخطبه... وفي راسها علامه استفهام كبيره ليه سراب ماقالت؟؟... اكلمها واسئلها؟؟... لا لا صعبه هو اخوها وصعبه اقولها؟؟...
ماابي اظلمها يمكن هي ماعندها خبر والموضوع بين امها واخوها؟؟.. ولا عبدالعزيز محلفها ماتتكلم؟؟..
راح الوقت وديم تفكر بالسبب اللي مايخلي سراب تعلمها
====================
نهايه الجزء التاسع...
اشوفكم على خييير
منتدى البرامج المشروحة
